ខេត្តកោះកុង ៖ ប្រជាពលរដ្ឋនាំគ្នាភ្ញាក់ផ្អើលបន្ទាប់ពីបានប្រទះឃើញសាកសពស្រ្តីម្នាក់នៅក្នុងទឹកស្ទឹង ត្រង់ចំណុចភូមិគគីរជ្រុំ ឃុំឫស្សីជ្រុំ ស្រុកថ្មបាំង ខេត្តកោះកុង នារសៀលថ្ងៃទី១៣ ខែមីនា ឆ្នាំ២០២១ រួចនាំគ្នារាយការណ៍ប្រាប់សមត្ថកិច្ចភ្លាម។
សមត្ថកិច្ចមូលដ្ឋានពេលចុះទៅដល់ស្រាវជ្រាវយ៉ាងយូរទើបស្គាល់ជនរងគ្រោះឈ្មោះចាន់ ពៅ ភេទស្រី អាយុ៤១ឆ្នាំ មុខរបរមិនពិតប្រាកដ មានទីលំនៅកំណើត ភូមិស្នោ ឃុំស្នេហ៍ឧត្តម ស្រុកព្រះស្ដេច ខេត្តព្រៃវែង ។ បច្ចុប្បន្នស្នាក់នៅបណ្ដោះអាសន្នភូមិគគីរជ្រុំ ឃុំឫស្សីជ្រុំ ស្រុកថ្មបាំង ខេត្តកោះកុង ។
តាមការចូលរួមពិនិត្យរបស់គ្រូពេទ្យ និងផ្នែកជំនាញ អាជ្ញាធរភូមិ-ឃុំ ឃើញថា សពមានស្លាកស្នាមរបួស២កន្លែងត្រង់ថ្ងាស១កន្លែង និងក្រោមផ្ចិត១កន្លែង មានសភាពហើមរលួយក្លិនស្អុយ ផ្នែកក្បាលមានរបួសធ្ងន់អាចបណ្ដាលឲ្យធ្លាក់ទឹកស្លាប់ សង្ស័យជាករណីឃាតកម្ម។
ករណីនេះ សមត្ថកិច្ចកំពុងធ្វើការស្រាវជ្រាវបន្ត ។ ចំពោះសាកសពជនរងគ្រោះវិញសមត្ថកិច្ច បានប្រគល់ឲ្យអាជ្ញាធរមូលដ្ឋានចាត់ចែងធ្វើបុណ្យតាមប្រពៃណី និងកំពុងស្រាវជ្រាវរកគ្រួសារគាត់៕
ដោយ៖ ប្រាថ្នា
