អន្តរជាតិ៖ ដេីម្បីត្រៀមសម្រាប់ជំនួបជាមួយប្រធានាធិបតីអាមរិក លោក ចូ បៃឌិន នៅខែក្រោយនេះ លោកនាយករដ្ឋមន្ត្រីជប៉ុន ស៊ូហ្កា យូស៊ីហ៊ីដេ នៅថ្ងៃទី១៦ ខែមីនា ឆ្នាំ២០២១ បានទទួលការចាក់វ៉ាក់សាំងការពារកូវីដ-១៩ របស់ក្រមហ៊ុន Pfizer លើកដំបូងគេក្នុងជួររដ្ឋាភិបាលជាសាធារណៈ។
បេីតាមលោកនាយករដ្ឋមន្ត្រី ស៊ូហ្កា យូស៊ីហ៊ីដេ ប្រាប់អ្នកសារព័ត៌មានក្រោយទទួលវ៉ាក់សាំងកូវីដ-១៩ លើកដំបូងនៅថ្ងៃទី១៦ ខែមីនា យ៉ាងដូច្នេះថា៖«វាមិនឈឺឡើយ»។ លើសពីនេះវេជ្ជបណ្ឌិតជប៉ុន បានត្រួតពិនិត្យភ្នែក និងបំពង់កលោក ស៊ូហ្កា មុនពេលចាក់វ៉ាក់សាំង ហើយប្រហែលជាបីសប្តាហ៍ទៀត លោកនឹងត្រូវទទួលការចាក់វ៉ាក់សាំងដូសទី២។
ជាមួយគ្នានេះ ក្រៅពីលោក ស៊ូហ្កា ក៏មានមន្ត្រីអមដំណើរប្រមាណ៩០នាក់ទៀត ត្រូវចាក់វ៉ាក់សាំងដូចគ្នាដែរ។ ខណៈលោក ស៊ូហ្កា នឹងក្លាយជាមេដឹកនាំបរទេសទីមួយ ជួបតទល់ផ្ទាល់នឹងលោកចូ បៃឌិន អំឡុងវិបត្តិកូវីដ-១៩នេះ។
នាយករដ្ឋមន្ត្រីជប៉ុន លោក ស៊ូហ្កា បានសន្យាថា ជប៉ុននឹងមានវ៉ាក់សាំងគ្រប់គ្រាន់សម្រាប់ចាក់ឱ្យប្រជាជន ចំនួន១២៦លាននាក់នៅត្រឹមខែមិថុនា ពោលគឺមុនពេលចាប់ផ្តើមព្រឹត្តិការណ៍ អូឡាំពិកនៅទីក្រុងតូក្យូ ដែលនឹងចាប់ផ្ដើមនាថ្ងៃទី ២៣ ខែកក្កដា។
គួរបញ្ជាក់ថា ប្រទេសជប៉ុន បានចាក់ផ្តើមយុទ្ធនាការចាក់វ៉ាក់សាំងជូនប្រជាជនចាប់តាំងពីខែកុម្ភៈ ជាមួយនឹងវ៉ាក់សាំងរបស់ Pfizer ដែលអភិវឌ្ឍជាមួយក្រុមហ៊ុន BioNTech។ គិតត្រឹមថ្ងៃទី១៥ ខែមីនានេះ ជប៉ុនបានចាក់វ៉ាក់សាំងដល់ប្រជាជនជាង ២៩ម៉ឺននាក់រួចមកហើយ សម្រាប់វ៉ាក់សាំងដូសទី១។ បុគ្គលិកសុខាភិបាល និងអ្នកដែលមានអាយុលើសពី៦៥ឆ្នាំ ស្ថិតក្នុងក្រុមអាទិភាពរបស់រដ្ឋាភិបាល។
ដោយឡែកទាក់ទិននឹងបញ្ហានេះដែរ អតីតអធិរាជ Akihito មានព្រះជន្ម ៨៧ វស្សា ក៏បានស្ថិតនៅក្នុងក្រុមដែលត្រូវទទួលបានវ៉ាក់សាំង ក្នុងដំណាក់កាលដំបូងដែរ។ ចំណែកព្រះចៅអធិរាជ Naruhito ដែលមានព្រះជន្ម ៦១ វស្សា នឹងត្រូវរង់ចាំការចាក់វ៉ាក់សាំងដំណាក់កាលក្រោយ៕ដោយ៖ស តារា
នាយករដ្ឋមន្ត្រីជប៉ុន ស៊ូហ្កា យូស៊ីហ៊ីដេ ទទួលវ៉ាក់សាំងរបស់ក្រមហ៊ុន Pfizerលេីកទីមួយ
រូបថត៖ AFP
