ខេត្តបាត់ដំបង៖ កម្លាំងនគរបាលព្រំដែនគីឡូ៩ សហការជាមួយ កម្លាំងយោធាវរសេនាតូច៥៣៣, កម្លាំងសឹករងស្រុកសំពៅលូន និងកម្លាំងប៉ុស្តិ៍នគរបាលរដ្ឋបាលជ្រៃសីមានៃអធិការដ្ឋាននគរបាលស្រុកសំពៅលូន បានទៅទទួលប្រជាពលរដ្ឋត្រឡប់មកពីប្រទេសថៃ ចូលមកប្រទេសកម្ពុជាវិញ ចំនួន៣៦ នាក់ (ស្រី១៤នាក់ ក្នុងនោះក្មេងប្រុស៦នាក់ និងក្មេងស្រី៤នាក់) រួចយកទៅធ្វើចត្តាឡីស័កភ្លាមៗផងដែរ។
ប្រតិបត្តិការនេះធ្វើឡើងកាលពីរសៀលថ្ងៃទី១៧ ខែ មីនា ឆ្នាំ ២០២១ នៅចំណុចភូមិស្ពានយោល ឃុំជ្រៃសីមា ស្រុកសំពៅលូន ខេត្តបាត់ដំបង តាមការណែនាំរបស់លោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង។
សមត្ថកិច្ចបានឲ្យដឹងថាបន្ទាប់ពីធ្វើការសាកសួរពលពលរដ្ឋទាំងនោះរួច ពួកគាត់បានធ្វើការអប់រំណែនាំ ហើយកម្លាំង បានប្រគល់ពួកគាត់ឲ្យទៅក្រុមគ្រូពេទ្យដើម្បីទទួលយកទៅកាន់មណ្ឌលចត្តាឡីស័កនៅអនុវិទ្យាល័យកូនភ្នំ៣២ តាមការណែនាំរបស់ក្រសួងសុខាភិបាល ត្រឹមត្រូវ៕
ដោយ៖ ប្រាថ្នា
