ខេត្តបន្ទាយមានជ័យ៖ ហេតុការណ៍គួរឲ្យរន្ធត់មួយបានកេីតឡេីង បន្ទាប់ពីបុរស២នាក់ ត្រូវបានជនមិនស្គាល់មុខលួចកាប់ប្រហារទាំងកណ្ដាលអាធ្រាត្រដល់បន្ទប់ជួល បណ្តាលឲ្យម្នាក់ស្លាប់យ៉ាងអាណោចអាធ័ម និងម្នាក់ទៀតរងរបួសធ្ងន់។ ចំណែកជនដៃដល់ បានរត់គេចខ្លួនបាត់។
ករណីឃាតកម្មខាងលេីនេះ បានកើតឡើងកាលពីវេលាម៉ោង៣រំលងអធ្រាត្រឈានចូលថ្ងៃអាទិត្យទី២១ ខែមីនា ឆ្នាំ២០២១ នៅចំណុចផ្ទះជួល ស្ថិតក្នុងភូមិខ្លាកូនចាស់ សង្កាត់កំពង់ស្វាយ ក្រុងសិរីសោភ័ណ។
បើតាមប្រភពពីលោកឧត្តមសេនីយ៍ត្រី នូ ជីវ័ន្ត ស្នងការរងទទួលការងារផែនព្រហ្មទណ្ឌ នៃស្នងការដ្ឋាននគរបាលខេត្តបន្ទាយមានជ័យ បានថ្ងៃអាទិត្យទី២១ ខែមីនា ឆ្នាំ២០២១នេះថា ជនរងគ្រោះដែលស្លាប់នៅនឹងកន្លែងកើតហេតុមានឈ្មោះ ឈីវ ហាក់ ភេទប្រុស អាយុ៣៨ឆ្នាំ មុខរបរជាងដែក ស្នាក់នៅធ្វើការក្នុងស្រុកស្វាយចេក និងមានស្រុកកំណើតក្នុងភូមិអូរតាគី ឃុំអូរតាគី ស្រុកថ្មគោល ខេត្តបាត់ដំបង ព្រមទាំងមានប្រពន្ធឈ្មោះ យុង ណី អាយ៣០ឆ្នាំ ។ ចំណែកជនរងគ្រោះម្នាក់ទៀត រងរបួសធ្ងន់ធ្ងរដោយសន្លប់មិនទាន់ដឹងខ្លួនទេ នៅមិនទាន់ស្គាល់អត្តសញ្ញាណនៅឡើយទេ។
លោកឧត្តមសេនីយ៍ត្រី នូ ជីវ័ន្ត បន្តថា ពាក់ព័ន្ធនឹងករណីកាប់សម្លាប់គ្នានេះ គឺបានកើតឡើងនៅវេលាម៉ោង៣រំលងអធ្រាត្រឈានចូលថ្ងៃទី២១ ខែមីនា នៅចំណុចផ្ទះជួលភូមិខ្លាកូនចាស់ សង្កាត់កំពង់ស្វាយ ក្រុងសិរីសោភ័ណ។ ក្រោយកេីតហេតុកម្លាំងនគរបាលជំនាញសហការការជាមួយកម្លាំងកងរាជអាវុធហត្ថខេត្ត និងមន្ត្រីសុខាភិបាល ចុះពិនិត្យកន្លែងកើតហេតុជាក់ស្តែងឃើញថា ជនរងគ្រោះត្រូវជនដៃដល់កាប់បណ្តាលចំកញ្ចឹង.កខាងក្រោយប្រហែងជាង១តឹក ទើបបណ្តាលឲ្យរងរបួសធ្ងន់របស់ដល់បាត់បង់ជីវិតក្បែរម៉ូតូ និងម្នាក់ទៀតកាប់ចំក្បាល បណ្តាលឲ្យរងរបួសធ្ងន់សន្លប់មិនទាន់ដឹងខ្លួននោះឡើយ បច្ចុប្បន្នកំពុងសង្គ្រោះបន្ទាន់នៅមន្ទីរពេទ្យមិត្តភាពកម្ពុជា-ជប៉ុនមង្គលបូរី។
ដោយឡែកជុំវិញករណីនេះដែរ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ក៏បានឲ្យដឹងនៅថ្ងៃនេះដែរថា ករណីកាប់សម្លាប់គ្នាបណ្តាលឲ្យមានអ្នកស្លាប់ និងម្នាក់ទៀតរបួសធ្ងន់នេះ នៅមិនទាន់ដឹងមូលហេតុច្បាស់លាស់នៅឡើយទេ។ ប៉ុន្តែអាចដឹងព័ត៌មានខ្លះៗ ព្រោះសង្ស័យជនរងគ្រោះមានគ្នា២ទៅ៣នាក់ជិះម៉ូតូម៉ាកហុងដាឌ្រីម ពាក់ស្លាកលេខបន្ទាយមានជ័យ 1T.4518 ចូលក្នុងផ្ទះជួល ក៏ស្រាប់តែត្រូវបានជនដៃដល់ លួចធ្វេីសកម្មភាពកាប់ប្រហារតែម្តង។ ពេលនេះកម្លាំងជំនាញកំពុងតែស្រាវជ្រាវរកឃើញតម្រូវខ្លះបន្តទៀតហើយ។
លោកស្នងការ បានបន្ថែមទៀតថា បច្ចុប្បន្នកម្លាំងជំនាញចុះពិនិត្យកន្លែងកើតហេតុ គឺម្ចាស់ផ្ទះជួលបានគេចខ្លួនបាត់ ចំណែកអ្នកស្នាក់នៅប្រមាណជាង១០បន្ទប់នោះក៏នាំគេចខ្លួនបាត់អស់ទៀត។ ចំណែកសាកសព កម្លាំងជំនាញកំពុងពិនិត្យ និងទំនាក់ទំនងទៅគ្រួសារសាច់ញាតិ ដើម្បីទទួលយកសពទៅធ្វើបុណ្យតាមប្រពៃណី។
ក្រោយកេីតហេតុ លោកឧត្តមសេនីយ៍ត្រី នូ ជីវ័ន្ត ស្នងការរងនគរបាលខេត្តបន្ទាយមានជ័យ បានដឹកនាំកម្លាំងជំនាញកំពុងស្រាវជ្រាវបន្ត ដើម្បីស្វែងរកចាប់ខ្លួនជនដៃដល់ ដើម្បីយកមកដាក់ទោសតាមច្បាប់៕ដោយ៖សហការី
