ខេត្តព្រះសីហនុ៖ ប្រជាពលរដ្ឋខេត្តព្រះសីហនុ កំពុងព្រួយបារម្ភ ចំពោះសកម្មភាពឃុបឃិតរំលោភយកដីនៅជុំវិញបរិវេណបឹងកង្កែប ដែលជាបឹងធម្មជាតិសម្បូរទៅដោយព្រៃកោងកាងជាជម្រកត្រីសមុទ្របន្តពូជ។ ទីតាំងបឹងកង្កែបដែលរងការរំលោភបំពានធ្វើកម្មសិទ្ធិពីសំណាក់ បុគ្គលមួយចំនួន បានកើតមានជាយូរឆ្នាំមកហើយ ប៉ុន្តែអាជ្ញាធរស្ថាប័នពាក់ព័ន្ធខេត្តព្រះសីហនុ គ្មានសកម្មភាពទប់ស្កាត់ទេ។
ប្រភពពីប្រជាពលរដ្ឋបានឱ្យដឹងថា បឹងកង្កែបជាបឹងធម្មជាតិសម្បូរទៅដោយព្រៃកោងកាងរាប់រយហិចតារ មានទីតាំងនៅភូមិអុង ឃុំរាម ស្រុកព្រៃនប់ ខេត្តព្រះសីហនុ ឬនៅជាប់ចម្ការដូងចេងហេង នាឆ្នេរសមុទ្ររាម។ ប្រជាពលរដ្ឋរស់នៅមូលដ្ឋាននេះ និងភ្ញៀវទេសចរដែលចូលទៅដល់ទីតាំងនោះ បង្ហាញការសោកស្ដាយដែលព្រៃកោងកាងដុះនៅជុំវិញបរិវេណបឹងកង្កែប ត្រូវគេកាប់ទន្ទ្រាន ឬពុះច្រៀកជាឡូៗធ្វើកម្មសិទ្ធិ ដោយគ្មានអាជ្ញាធរពីស្ថាប័នណាមួយក្នុងខេត្តនេះ ចេញមុខទប់ស្កាត់ទេ។
ពលរដ្ឋភូមិអុង និងមន្ត្រីរាជការចូលនិវត្តន៍ខ្លះចោទថា កន្លងមកនេះ លោកឧកញ៉ា លឹម ហ៊ុយឡេង លោកឧត្ដមនាវីឯក អ៊ុក សីហា មេបញ្ជាការកងទ័ពជើងទឹកមូលដ្ឋានសមុទ្ររាម និងលោក នួន ប៊ុនថុល នាយកទីចាត់ការអន្តរវិស័យសាលាខេត្តព្រះសីហនុ ជាដើម មានជាប់ពាក់ព័ន្ធ ឬមានឈ្មោះទន្ទ្រានកាន់កាប់ដីព្រៃកោងកាងនៅភូមិអុង ជុំវិញបរិវេណបឹងកង្កែបនេះដែរ។ លោក អ៊ុក សីហា បានយកទីតាំងដីព្រៃកោងកាងយកទៅដាំដូង និងអ្នកជាប់ពាក់ព័ន្ធផ្សេងៗទៀត បានលក់បន្ត និងបុគ្គលខ្លះទៀត បានចាក់ដី ឬបោះបង្គោលថ្មកំណត់ទីតាំងដីរៀងៗខ្លួន ប៉ុន្តែមិនទាន់មានការដាំដុះទេ។
ជុំវិញការចោទប្រកាន់នេះ នាយកទីចាត់ការអន្តរវិស័យសាលាខេត្តព្រះសីហនុ លោក នួន ប៊ុនថុល បានបដិសេធថា លោកមិនបានទន្ទ្រានកាន់កាប់ព្រៃកោងកាងនៅជុំវិញបរិវេណបឹងកង្កែប ឬនៅភូមិអុង ដូចការចោទទេ។ ប៉ុន្តែទទួលស្គាល់ថា ដីព្រៃកោងកាងនៅតំបន់នេះ ពិតជាមានឈ្មួញមានទ្រព្យមានងារជាឧកញ៉ា និងមន្ត្រីមានអំណាច កំពុងធ្វើការទាំងក្នុងស្ថាប័នស៊ីវិល និងកងកម្លាំងប្រដាប់អាវុធមានឈ្មោះកាន់កាប់ដីនៅតំបន់នោះពិតមែន។
ដោយឡែក អាជ្ញាធរភូមិអុង និងឃុំរាម ស្រុកព្រៃនប់ ខេត្តព្រះសីហនុ ទទួលស្គាល់ថា ព្រៃកោងកាងនាមូលដ្ឋាននេះ ពិតជាត្រូវរងការបំផ្លាញជាបន្តបន្ទាប់ ហើយឈ្មួញ និងមន្ត្រីរដ្ឋាភិបាល បានជាប់ពាក់ព័ន្ធសកម្មភាពកាន់កាប់ដីនៅជុំវិញបរិវេណបឹងកង្កែបពិត មែន ប៉ុន្តែករណីនេះ អាជ្ញាធរត្រឹមថ្នាក់ភូមិ-ឃុំមិនមានលទ្ធភាពទប់ស្កាត់ទេ។
អភិបាលខេត្តព្រះសីហនុ លោក យន្ត មីន មានប្រសាសន៍ថា លោកបានទទួលព័ត៌មានពីការទន្ទ្រានកាន់កាប់ដីព្រៃកោងកាង ឬដីចំណីមាត់បឹងកង្កែបនៅភូមិអុង ឃុំរាម នេះហើយ ហើយបានកោះហៅ លោក នួន ប៊ុនថុល នាយកទីចាត់ការអន្តរវិស័យសាលាខេត្តនេះ ឲ្យមកបំភ្លឺរួចហើយ។ លោកថា នឹងចុះពិនិត្យជាក់ស្តែងលើសកម្មភាពទន្ទ្រានកាន់កាប់ព្រៃកោងកាងនា មូលដ្ឋាននេះនៅថ្ងៃខាងមុខ។
ទោះជាយ៉ាងណា ប្រជាពលរដ្ឋបានសំណូមពរ បានសំណូមពរឱ្យអាជ្ញាធរខេត្ត ក៏ដូចជាក្រសួងស្ថាប័នពាក់ព័ន្ធ គួមានវិធានការទប់ស្កាត់ សកម្មភាពឃុបឃិតទន្ទ្រានកាន់កាប់ ឬពុះច្រៀកដីព្រៃកោងកាងនៅជុំវិញដីចំណីបឹងកង្កែបនាភូមិអុង ដើម្បីឈានដល់រឹបអូសដីព្រៃកោងកាង ដែលត្រូវបុគ្គលមួយចំនួនរំលោភយកធ្វើកម្មសិទ្ធិ មកដាក់ជាសម្បត្តិរដ្ឋ និងអភិរក្សព្រៃកោងកាងនៅតំបន់ភូមិអុង ឬបឹងកង្កែបនេះឲ្យបានគង់វង្ស ទុកសម្រាប់ត្រីសមុទ្របន្តពូជដូចដើមវិញ ៕
ដោយ៖ វិបុល
