ភ្នំពេញ៖ បុរស៣នាក់ចេញពីផឹកសីុនិងច្រៀងខារ៉ាអូខេនៅ ឌីយ៉ាម៉ង់ ខារ៉ាអូខេក្បែរស្ពានដែកចំការដូងក្នុងស្ថានភាពស្រវឹងឡើងជោកជាំនិងបានបើករថយន្តទៅបុកពំនូកថ្មដែលក្រុមហ៊ុនធ្វើផ្លូវចាក់គរនៅតាមចិញ្ចើមផ្លូវបណ្ដាលឲ្យរថយន្តហោះក្រឡាប់ផ្ងារជើងឡើងលើបណ្ដាលឲ្យរងរបួសស្រាល ។
ក្នុងហេតុការណ៍នេះដែរបានកើតឡើងកាលពីវេលាម៉ោង១ និង២០យប់រំលងអាធ្រាត្រឈានចូលថ្ងៃទី៣ ខែមិីនា ឆ្នាំ២០១៦ នៅទល់មុខវត្តធុងដុង្គចំការដូង ផ្លូវលេខ២១៧ ភូមិសំបួរ សង្កាត់ដង្កោ ខណ្ឌដង្កោរ ។
តាមប្រភពព័ត៌មានពីកន្លែងកើតហេតុ បានឲ្យដឹងថា ដំបូងឡើយគេឃើញបុរស៣នាក់ អាយុប្រមាណជា៤០ឆ្នាំ បើករថយន្តបង្កម៉ាក រ៉េហ្វ័រ ពណ៌ឈាមជ្រូក ពាក់ស្លាកលេខ កណ្ដាល 2A-4006 ធ្វើដំណើរតាមផ្លួវ ២១៧ ទិសដៅពីជើងទៅត្បូង ក្នុងល្បឿនយ៉ាងលឿន ដោយក្នុងស្ថានភាពស្រវឹងស្រា ដែលទើបនឹងចេញពីផឹកសីុនិងច្រៀងខារ៉ាអូខេ ហើយបានធ្វើដំណើរត្រឡប់ទៅផ្ទះ វិញនៅខេត្តកំពង់ស្ពឺ ខណៈពេលមកដល់ចំណុចខាងលើ ក៏បានរេចង្កូតទៅបុកនិងពំនូកថ្មអង់ឌឺ ដែលគេចាក់គរទុកធ្វើផ្លូវ បណ្តាលឲ្យរថយន្តហោះក្រឡាប់ផ្ងារជើង ឡើងលើធ្វើឲ្យរថយន្តក្រពិតដំបូល និងបែកកញ្ចក់ខាងមុខ រងរបួសរលាត់ដៃជើងស្រាល ទាំងបីនាក់។ ភ្លាមៗនោះម្ចាស់រថយន្តបានជួលអ្នកដំណើរតាមផ្លូវឲ្យជួយទាញរថយន្ត ត្រលប់មកធម្មតាវិញ ។
ក្រោយពេលកើតហេតុ ដោយសារតែរថយន្តបង្កនោះមិនមានប៉ះពាល់ ដល់ទ្រព្យសម្បត្តិសាធារណៈ ក៏ត្រូវបានសមត្ថកិច្ចហៅរថយន្តមកស្ទូច យកទៅជួសជុលដោយខ្លួនឯងតែម្ដង ៕
...
ដោយ៖ ជីម ភារ៉ា ដង្កោ
