អន្តរជាតិ៖ បើតាមទីភ្នាក់ងារព័ត៌មាន Reuters នៅព្រឹកថ្ងៃពុធ ទី៣១ ខែមីនា ឆ្នាំ២០២១នេះ បានចុះផ្សាយថា ក្រសួងការបរទេសអាមេរិក បានបង្គាប់ឲ្យបុគ្គលិកទូតរបស់ខ្លួន ដែលមិនមានភារកិច្ចចាំបាច់ ត្រូវតែចាកចេញពីប្រទេសមីយ៉ាន់ម៉ា ខណៈមានការព្រួយបារម្ភថា ស្ថានការណ៍បច្ចុប្បន្នអាចនឹងរុញច្រាន ឲ្យប្រទេសក្នុងតំបន់អាស៊ីអាគ្នេយ៍មួយនេះ ធ្លាក់ចូលក្នុងសង្រ្គាមស៊ីវិល។
ក្រសួងការបរទេសអាមេរិក កាលពីពាក់កណ្ដាលខែមីនា ក៏ធ្លាប់បានអនុញ្ញាតផងដែរឱ្យបុគ្គលិកទូតរបស់ខ្លួន ដែលមិនមានភារកិច្ចចាំបាច់ អាចចាកចេញពីប្រទេសមីយ៉ាន់ម៉ា ដោយស្ម័គ្រចិត្ត។ ប៉ុន្តែនៅក្នុងសេចក្ដីថ្លែងការណ៍ ចេញផ្សាយនៅថ្ងៃអង្គារទី៣០ ខែមីនាម្សិលមិញនេះ ក្រសួងការបរទេសអាមេរិកបានធ្វើបច្ចុប្បន្នភាពលើការសម្រេចចិត្តនេះ ដោយប្ដូរវាទៅជាបទបញ្ជាវិញ។
ទន្ទឹមនឹងនោះ ក្រសួងការបរទេសអាមេរិក បានគូសបញ្ជាក់យ៉ាងដូច្នេះថា៖ «ក្រសួងការបរទេសអាមេរិកបានសម្រេចចិត្ត បង្គាប់ឱ្យបុគ្គលិកទូតមិនមានភារកិច្ចចាំបាច់ ចាកចេញពីភូមា (មីយ៉ាន់ម៉ា) ដោយសារតែបញ្ហាសុវត្ថិភាព និងសន្តិសុខនៃបុគ្គលិករដ្ឋាភិបាលអាមេរិក និងអ្នកដែលស្ថិតនៅក្រោមអាណាព្យាបាលរបស់ពួកគេ»។
សូមជម្រាបថា គិតចាប់តាំងពីមានរដ្ឋប្រហារកាលពីថ្ងៃទី០១ ខែកុម្ភៈមក បាតុករកើនលើស ៥២០នាក់ហើយ ត្រូវបានកងកម្លាំងសន្តិសុខមីយ៉ាន់ម៉ាបាញ់សម្លាប់។
គួរបញ្ជាក់ថា ទោះជាការស្លាប់កាន់តែកើនឡើងក៏ដោយ ក៏ក្រុមបាតុករនៅតែបន្តធ្វើបាតុកម្ម តវ៉ាប្រឆាំងរបបយោធាដដែល ស្របពេលកងកម្លាំងប្រដាប់អាវុធ ជនជាតិដើមភាគតិចមួយចំនួន ក្នុងប្រទេសមីយ៉ាន់ម៉ា បានសន្យាថា នឹងការពារជនស៊ីវិលពីការសម្លាប់របស់យោធា ដែលនេះកំពុងបង្កឱ្យមានការព្រួយបារម្ភ ចំពោះជម្លោះប្រដាប់អាវុធ ឬសង្រ្គាមស៊ីវិលដែលអាចនឹងផ្ទុះឡើង៕ដោយ៖ស តារា
ក្រុមប៉ូលីសមីយ៉ាន់ម៉ា ចាប់ខ្លួនក្រុមបាតុករប្រឆាំងរដ្ឋប្រហារយោធា
រូបភាព៖ស្ថានទូតអាមេរិកប្រចាំនៅប្រទេសមីយ៉ាន់ម៉ា
រូបភាព៖ឯកសារ
