ភ្នំពេញ៖ នៅព្រឹកថ្ងៃព្រហស្បតិ៍ទី១ ខែមេសា ឆ្នាំ២០២១នេះ បើយោងតាមសេចក្តីប្រកាសព័ត៌មានរបស់អង្គការយូនីសេហ្វ បានបញ្ជាក់ថា រាជរដ្ឋាភិបាលជប៉ុន បានផ្ដល់ថវិការជំនួយបន្ទាន់ក្នុងទឹកប្រាក់ ៣៦,៩ លានដុល្លារ ដល់យូនីសេហ្វប្រចាំតំបន់អាស៊ីបូព៌ា និងប៉ាស៊ីហ្វិក ដើម្បីកែលម្អការ គ្រប់គ្រងប្រព័ន្ធត្រជាក់សម្រាប់ទុកដាក់វ៉ាក់សាំងក្នុងប្រទេសចំនួន១២ ដែលរងផលប៉ះពាល់ ដោយជំងឺកូវីដ-១៩ដោយនៅក្នុងនោះរួមទាំងកម្ពុជាផងដែរ។
នៅក្នុងសេចក្តីប្រកាសព័ត៌មានរបស់អង្គការយូនីសេហ្វ បានបញ្ជាក់បន្ថែមថា ថវិកាជិត ១លានដុល្លារនៃថវិកាសរុបនឹងត្រូវដកមកប្រើប្រាស់ ដើម្បីគាំទ្ររាជរដ្ឋាភិបាលកម្ពុជាក្នុងកិច្ចខិតខំប្រឹងប្រែងចាក់វ៉ាក់សាំងកូវីដ-១៩ ជាពិសេស ដើម្បីបង្កើនសមត្ថភាពនៃប្រព័ន្ធត្រជាក់តាមរយៈការរៀបចំនូវហេដ្ឋារចនាសម្ព័ន្ធ បរិក្ខារ មធ្យោបាយដឹកជញ្ជូន និងផ្តល់ការបណ្ដុះបណ្ដាលដល់បុគ្គលិកសុខាភិបាល។ សមត្ថភាព នៃប្រព័ន្ធត្រជាក់មានសារៈសំខាន់យ៉ាងខ្លាំងសម្រាប់ការដឹកជញ្ជូនវ៉ាក់សាំងដែលត្រូវរក្សាទុកក្នុងសីតុណ្ហភាពត្រជាក់ដើម្បីរក្សាប្រសិទ្ធភាព រាប់បញ្ចូលទាំងវ៉ាក់សាំងកូវីដ-១៩ផងដែរ។
សូមជម្រាបថា កាលពីខែធ្នូ ឆ្នាំ២០២០កន្លងទៅ ជាផ្នែកមួយនៃការរៀបចំសម្រាប់យុទ្ធនាការចាក់វ៉ាក់សាំង រាជរដ្ឋា ភិបាលកម្ពុជា យូនីសេហ្វ និងដៃគូដទៃទៀត បានធ្វើការវាយតម្លៃសមត្ថភាពនៃប្រព័ន្ធត្រជាក់ សម្រាប់ទុកដាក់វ៉ាក់សាំងរបស់ប្រទេសនេះ។ ការវាយតម្លៃបានរកឃើញនូវចំណុចមួយ ចំនួនដែលត្រូវពង្រឹងបន្ថែមដោយប្រើប្រាស់ថវិកាគាំទ្រថ្មីនេះ។ ដូច្នេះថវិកាជំនួយនេះនឹង បង្កើនសមត្ថភាពនៃប្រព័ន្ធសុខាភិបាលរបស់ប្រទេសកម្ពុជា ខណៈដែលប្រទេសនេះកំពុង ចាប់ផ្ដើមអនុវត្តកម្មវិធីចាក់វ៉ាក់សាំងរហ័ស និងក្នុងទ្រង់ទ្រាយធំបំផុតដែលមិនធ្លាប់មាន នៅក្នុងប្រវត្តិសាស្ត្រ។ ជាការសំខាន់ណាស់ដែលយើងត្រូវធានាថាការបែងចែកវ៉ាក់សាំង កូវីដ-១៩ នឹងមិនដាក់បន្ទុកធ្ងន់ធ្ងរពេកមកលើសមត្ថភាពបច្ចុប្បន្នដែលអាចបង្កឱ្យមានការ រំខានដល់សេវាផ្ដល់ថ្នាំបង្ការសម្រាប់កុមារ ហើយក្នុងពេលជាមួយគ្នា ត្រូវពង្រឹងសមត្ថភាពនៃ ប្រព័ន្ធសុខាភិបាលដែលមានស្រាប់ ដើម្បីឱ្យប្រទេសកម្ពុជានៅតែទទួលបានប្រយោជន៍ ក្រោយពេលចប់ជំងឺរាតត្បាតជាសកលនេះ។
ការធានាឱ្យការទទួលបានវ៉ាក់សាំងប្រកបដោយសមធម៌ និងការបែងចែកវ៉ាក់សាំងឱ្យបាន ឆាប់រហ័សគឺជាចំណោទរួមមួយរបស់សហគមន៍អន្តរជាតិក្នុងការឈានទៅសម្រេចគោលដៅ ទប់ស្កាត់ការឆ្លងរាលដាលនៃជំងឺកូវីដ-១៩នៅលើភពផែនដីទាំងមូល។ ដើម្បីរួមចំណែកដល់ ការសម្រេចគោលដៅនេះ ប្រទេសជប៉ុនបានផ្ដល់ជំនួយថវិកាចំនួន ២០០លានដុល្លារ ដល់កម្មវិធី COVAX ដែលជាយន្តការអន្តរជាតិដឹកនាំដោយ Gavi CEPI អង្គការសុខភាព ពិភពលោក និងយូនីសេហ្វ ដើម្បីធានា និងពន្លឿនការផ្ដល់វ៉ាក់សាំងប្រកបដោយសមធម៌ ក្នុងប្រទេសកំពុងអភិវឌ្ឍ។
បេីតាមការលេីកឡេីងរបស់ ឯកអគ្គរាជទូតប្រទេសជប៉ុនប្រចាំព្រះរាជាណាចក្រកម្ពុជា លោក មីកាមិ ម៉ាសាហ៊ីរ៉ូ (MIKAMI Masahiro) បានមានប្រសាសន៍ថា៖ “ការចែកចាយផ្ដល់វ៉ាក់សាំង គឺមានសារៈសំខាន់ ដូចគ្នាទៅនឹងវ៉ាក់សាំងដែរ។ រាជរដ្ឋាភិបាលជប៉ុនប្ដេជ្ញាជួយកែលម្អកម្មវិធីផ្ដល់វ៉ាក់សាំងនៅ ប្រទេសកំពុងអភិវឌ្ឍ។ បទពិសោធ ច្រើនឆ្នាំរបស់យូនីសេហ្វក្នុងកិច្ចសហការជាមួយនឹង រាជរដ្ឋាភិបាលកម្ពុជាលើការអនុវត្តកម្មវិធីផ្ដល់ថ្នាំបង្ការ គឺជាហេតុផលដែលធ្វើឱ្យយើង មានទំនុកចិត្តទាំងស្រុងថា ថវិកាជំនួយនេះពិតជានឹងនាំឱ្យសម្រេចបាននូវលទ្ធផលវិជ្ជមាន យ៉ាងធំធេងមកលើយុទ្ធនាការចាក់វ៉ាក់សាំងកូវីដ-១៩។ យើងនឹងបន្តសហការជាមួយ យូនីសេហ្វ និងរាជរដ្ឋាភិបាលកម្ពុជា រហូតដល់ពេលដែលយើងអាចនិយាយបានយ៉ាងពិត ប្រាកដថា យើងពិតជាបានទប់ស្កាត់បានទាំងស្រុង និងអាចស្តារទ្បើងវិញពីការរាតត្បាត ជាសកលនៃជំងឺកូវីដ-១៩”។
ក្នុងនាមជាអ្នកទិញវ៉ាក់សាំងធំជាងគេតែមួយគត់នៅក្នុងពិភពលោក យូនីសេហ្វត្រូវបាន ជ្រើសរើសឱ្យធ្វើជាស្ថាប័នដឹកនាំកិច្ចលទ្ធកម្ម និងការផ្គត់ផ្គង់សម្រាប់យន្តការកូវ៉ាក់។ នៅកម្ពុជា យូនីសេហ្វ និងអង្គការសុខភាពពិភពលោកបានបំពេញតួនាទីជាស្ថាប័នដឹកនាំ ការងារបច្ចេកទេស រយៈពេល៣ទសវត្សរ៍មកហើយ ក្នុងការគាំទ្រដល់ក្រសួងសុខាភិបាល ក្នុងការពង្រឹងកម្មវិធីផ្ដល់ថ្នាំបង្ការថ្នាក់ជាតិ ដែលផ្ដល់ជាប្រយោជន៍ដល់កុមាររាប់លាននាក់ ជារៀងរាល់ឆ្នាំ។
ដោយឡែកនាយិកាយូនីសេហ្វប្រចាំកម្ពុជា លោកស្រី ហ្វ័រូហ្គ ហ្វូយូហ្សិថ (Foroogh Foyouzat) បានមានប្រសាសន៍ថា៖“យើងសូមសម្ដែងនូវការដឹងគុណចំពោះរាជរដ្ឋាភិបាលជប៉ុនដែលបាន គាំទ្រដល់កម្ពុជាក្នុងពេលដ៏ចាំបាច់នេះ ជាពិសេសក្នុងពេលដែលចំនួនករណីកូវីដ-១៩កំពុងកើនឡើង។ ជំងឺរាតត្បាតជាសកល ពុំស្គាល់ព្រំដែននោះឡើយហើយវ៉ាក់សាំងត្រូវ តែបានផ្តល់ទៅដល់មនុស្សដែលងាយឆ្លងមេរោគនេះជាងគេ និងមុនគេ។ មូលនិធិដែលផ្ដល់ ដោយរាជរដ្ឋាភិបាលជប៉ុនមានតម្លៃមិនអាចកាត់ថ្លៃបាន ដើម្បីជួយឱ្យយើងទាំងអស់គ្នា អាចបន្តគាំទ្រដល់រាជរដ្ឋាភិបាលកម្ពុជាក្នុងការអនុវត្តយុទ្ធនាការច៉ាក់វ៉ាក់សាំងកូវីដ-១៩ ហើយស្របពេលជាមួយគ្នាដែរបន្តពង្រឹងប្រព័ន្ធសុខាភិបាលរបស់ប្រទេស។ នេះគឺជា ជំហានមួយដ៏សំខាន់ក្នុងការត្រួសត្រាយផ្លូវឆ្ពោះទៅរកការស្ដារឡើងវិញពីវិបត្តិនេះ”៕ដោយ៖សហការី
រូបភាព៖យុទ្ធនាការចាប់វ៉ាក់សាំងប្រឆាំងជំងឺកូវីដ-១៩ ជូនប្រជាពលរដ្ឋ នៅប្រទេសកម្ពុជា
