ភ្នំពេញ៖ លោក សុខ សម្បត្តិ អភិបាលនៃគណៈអភិបាលខណ្ឌព្រែកព្នៅ និងជាប្រធានគណៈបញ្ជាការឯកភាពខណ្ឌ នាយប់ថ្ងៃអាទិត្យ ៧រោច ខែចេត្រ ឆ្នាំជូត ទោស័ក ព.ស ២៥៦៤ត្រូវនឹងថ្ងៃទី០៤ ខែមេសា ឆ្នាំ២០២១ បានបន្តដឹកនាំកម្លាំងគណៈបញ្ជាការឯកភាពខណ្ឌដាក់គោលដៅត្រួតពិនិត្យយានជំនិះចំនួន០២គោលដៅ ដេីម្បីទប់ស្កាត់អ្នកបំពានបំរាមគោចរ។
ជាក់ស្ដែងគោលដៅទី១. ត្រង់ចំណុចមុខស្ថានីយប្រេងឥន្ទនៈតេលា ផ្លូវជាតិលេខ៥ និងគោលដៅទី២. មុខហាងលក់ម៉ូតូហុងដា ព្រែកព្នៅ បន្តចុះអនុវត្តវិធានការរដ្ឋបាល តាមសេចក្តីសម្រេចលេខ ០៦៨/២១ សសរ ស្តីពីការអនុវត្តវិធានការរដ្ឋបាលជាបណ្តោះអាសន្ន របស់រដ្ឋបាលរាជធានីភ្នំពេញ។
ក្នុងប្រតិបត្តិការនៅយប់ថ្ងៃដដែលនេះ កម្លាំងគណៈបញ្ជាការឯកភាពខណ្ឌព្រែកព្នៅ បានធ្វើការឃាត់រក្សាទុក១៤ថ្ងៃ នូវរថយន្ត ម៉ូតូ មួយចំនួនដែលបើកបរគ្មានការចាំបាច់ គ្មានកាតសំគាល់ខ្លួន និង គ្មានលិខិតបញ្ជាក់ពីអង្គភាព រឺ ក្រុមហ៊ុនឯកជន បំពានបំរាមគោចរការធ្វើចរាចរណ៍ពីចន្លោះ ម៉ោង ២០ និង០០នាទីយប់ រហូតដល់ ម៉ោង៥ និង០០ព្រឹក ដើម្បីទប់ស្កាត់ការរីករាលដាលជំងឺកូវីដ-១៩ ក្នុង ភូមិសាស្ត្រ រាជធានីភ្នំពេញ៕ដោយ៖ស តារា
