ខេត្តបាត់ដំបង៖ លោកឧត្តមសេនីយ៍ត្រី ហូ ភូរិន្ទ នាយសេនាធិការរងយោធភូមិភាគទី៥ នា ព្រឹកថ្ងៃទី៧ ខែមេសា ឆ្នាំ២០២១បានអញ្ជើញជាអធិបតីក្នុងពិធីប្រជុំបូកសរុបលទ្ធផលការងារយោធាសន្តិសុខឆ្នាំ២០២០ និងផ្សព្វផ្សាយផែនការសកម្មភាពការងារយោធាសន្តិសុខឆ្នាំ២០២១ នៅវរសេនាតូចវិស្វកម្មយោធភូមិភាគទី៥ ។
អញ្ជើញចូលរួមអមដំណើរមាន នាយនិងនាយរងការិយាល័យយោធភូមិភាគទី៥ ។
ក្នុងឱកាសបូកសរុប លោកឧត្តមសេនីយ៍ត្រី ក៏បានធ្វើការកោតសរសើរដល់កម្លាំងវរសេនាតូចដែលកន្លងមកបានប្រឹងប្រែងសម្រេចបានជោគជ័យគ្រប់ភារកិច្ចដែលថ្នាក់លើដាក់ជូនជាពិសេសចូលរួមចុះជួយសង្គ្រោះប្រជាពលរដ្ឋដែលជួបគ្រោះមហន្តរាយផ្សេងៗ។
ទិសដៅអនុវត្តត្រូវបន្តពង្រឹងការងារការពារជាតិ ខិតខំរៀនសូត្រជំនាញឲ្យកាន់តែស្ទាត់ជំនាញ។
ចូលរួមថែរក្សាសន្តិសុខ សណ្តាប់ធ្នាប់សង្គម រក្សានូវសុខសន្តិភាពនិងចូលរួមអនុវត្តគោលនយោបាយភូមិ ឃុំមានសុវត្ថិភាពនិងចុះជួយសង្គម។
អប់រំដល់កងទ័ពឲ្យបង្កើនឆន្ទៈ ស្មោះត្រង់ ជាតិ សាសនា ព្រះមហាក្សត្រនិងរាជរដ្ឋាភិបាលស្របច្បាប់។
លោក ក៏បានផ្តាំផ្ញើចុងក្រោយដល់កងទ័ពក្នុងវរសេនាតូច ឱ្យបង្កើនការផ្សព្វផ្សាយនិងអនុវត្តឲ្យបានជាដាច់ខាតនូវវិធានការរបស់ក្រសួងសុខាភិបាលក៏ដូចជាបទបញ្ជារបស់សម្ដេចតេជោ រក្សា៣ការពារ ៣កុំ ដើម្បីចូលរួមទប់ស្កាត់ការរីករាលដាលនូវជំងឺកូវីដ-១៩ កុំឱ្យមានការឆ្លងរាលដាលចូលក្នុងសហគមន៍ក៏ដូចជាភូមិសាស្ត្រដែលខ្លួនទទួលខុសត្រូវ ៕
ដោយ៖ សូរិយា
