ភ្នំពេញ៖ គិតមកដល់ពេលនេះ ភូមិចំនួន១០ហើយ នៃសង្កាត់ចំនួន២ ក្នុងខណ្ឌមានជ័យ និងខណ្ឌពោធិ៍សែនជ័យ ដែលត្រូវអាជ្ញាធររាជធានីភ្នំពេញ បានសម្រេចបិទខ្ទប់ (Lockdown) រយះពេល ២សប្តាហ៍ (១៤ថ្ងៃ)ដោយសារការរីករាលដាលនៃជំងឺឆ្លងកូវីដ១៩។
បេីយោងនៅក្នុងសេចក្តីសម្រេចរបស់សាលារាជធានីភ្នំពញ បានបញ្ជាក់ថា ការសម្រេចឲ្យបិទខ្ទប់នេះ សម្រាប់ខណ្ឌមានជ័យ មាន១សង្កាត់ គឺស្ទឹងមានជ័យ ស្មើនឹងភូមិចំនួន៣ រួមមាន៖ ភូមិទ្រា៤, ដំណាក់ធំ២ និងភូមិដំណាក់ធំ៣។ ចំណែកឯខណ្ឌពោធិ៍សែនជ័យ មានចំនួន៣សង្កាត់ ដូចជាសង្កាត់ចោមចៅទី១, សង្កាត់កាកាបទី១ និងកាកាបទី២ ដែលមានចំនួនភូមិសរុប ៧ រួមមាន៖ ភូមិត្រពាំងថ្លឹង២, ទួលពង្រ, ចំការឳឡឹក១, ប៉ប្រកខាងត្បូង, ប៉ប្រកខាងជើង, ត្រពាំងល្វា១ និងចំការឳឡឹក២។ គ្រប់គោលដៅទាំងអស់ខាងលើនេះ ដោយមានដាក់គណៈបញ្ជាការឯកភាព ប៉ូលិស សន្តិសុខ និងប៉េអឹមជាដើម ដើម្បីអនុវត្តន៍តាមវិធានការបិទខ្ទប់ បុគ្គលគ្រប់រូបត្រូវបានហាមឃាត់ការធ្វើដំណើរចេញពីលំនៅឋាន ឬទីសំណាក់បច្ចុប្បន្ន លើកលែងតែក្នុងករណីចាំបាច់តែប៉ុណ្ណោះ។
ជាក់ស្ដែងចំពោះការសម្រេចឲ្យបិទខ្ទប់ខាងលើនេះ សាលារាជធានីភ្នំពញ បានបញ្ជាក់បន្ថែមទៀតថា គឺមានរយៈពេល២សប្ដាហ៍ (១៤ថ្ងៃ) ដោយតំបន់ខ្លះគិតចាប់ពីថ្ងៃទី១០ និងតំបន់មួយចំនួនទៀត គិតចាប់ពីថ្ងៃទី១១ ដល់ថ្ងៃទី២៤ ខែមេសា ឆ្នាំ២០២១ ក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ១៩ នៅក្នុងភូមិសាស្ត្រដែលត្រូវបានបិទខ្ទប់ និងទប់ស្កាត់ជំងឺនេះមិនឲ្យឆ្លងរាលដាលទៅតំបន់ផ្សេងទៀត។
សូមជម្រាបដែរថា ក្នុងអំឡុងពេល នៃការអនុវត្តវិធានការបិទខ្ទប់នេះ បុគ្គលគ្រប់រូបត្រូវបានហាមឃាត់ការធ្វើដំណើរចេញពីលំនៅឋាន ឬទីសំណាក់បច្ចុប្បន្ន លើកលែងតែក្នុងករណីចាំបាច់ ដូចជា៖ ការធ្វើដំណើរទៅបំពេញការងារ ឬប្រកបមុខរបរ ឬអាជីវកម្មក្នុងភូមិសាស្ត្រដែលត្រូវបានបិទខ្ទប់ និងដែលមិនមានការហាមឃាត់ ដោយត្រូវភ្ជាប់មកជាមួយនូវលិខិតបញ្ជាក់អំពីការងារ មុខរបរ ឬអាជីវកម្ម, ការធ្វើដំណើរទៅកាន់ទីកន្លែងលក់ម្ហូបអាហារ ឬគ្រឿងឧបភោគបរិភោគ និងសម្ភារៈប្រើប្រាស់ចាំបាច់ប្រចាំថ្ងៃ ដែលអនុញ្ញាតឲ្យបើកដំណើរការដោយ អាជ្ញាធរមានសមត្ថកិច្ច។ ការធ្វើដំណើរក្នុងគោលបំណងនេះ អាចធ្វើឡើងដោយសមាជិកយ៉ាងច្រើន ២(ពីរ)នាក់ ក្នុងមួយលំនៅឋាន ឬទីសំណាក់មិនឲ្យលើសពី ២(ពីរ)ដង ក្នុងមួយសប្តាហ៍ និងនៅក្នុងរង្វង់ភូមិសាស្ត្រដែលត្រូវបានបិទខ្ទប់ និងការធ្វើដំណើរទៅមន្ទីរពេទ្យ មណ្ឌលសុខភាព សម្ភព ទីកន្លែងព្យាបាល ឬឱសថស្ថាន ដោយមូលហេតុសុខភាពបន្ទាន់ នៅក្នុងរង្វង់ភូមិសាស្ត្រដែលត្រូវ បានបិទខ្ទប់។ល។
បន្ថែមពីនេះ ក្នុងអំឡុងពេលនៃការអនុវត្តវិធានការបិទខ្ទប់ ត្រូវបានហាមឃាត់រាល់ការជួបជុំ ឬការប្រមូលផ្ដុំមនុស្សលើកលែងតែក្នុងករណីចាំបាច់ ដូចជា៖ ការជួបជុំក្នុងចំណោមសមាជិកគ្រួសារ ដែលរស់នៅក្នុងលំនៅឋាន ឬទីសំណាក់ជាមួយគ្នា និងការរៀបចំពិធីបុណ្យសព ដោយគោរពតាមការកំណត់របស់អាជ្ញាធរមានសមត្ថកិច្ច…។
ដោយឡែកជុំវិញបញ្ហានេះដែរ ក្នុងប្រការ៤ ក្នុងអំឡុងពេល នៃការអនុវត្តវិធានការបិទខ្ទប់ ត្រូវបានហាមឃាត់រាល់សកម្មភាពការងារ មុខរបរ ឬអាជីវកម្ម ដែលមិនមែនជាតម្រូវការចាំបាច់ប្រចាំថ្ងៃ លើកលែងតែក្នុងករណីចាំបាច់ ដូចជា៖ សកម្មភាពការងារនៅក្នុងក្របខណ្ឌមុខងារសាធារណៈ កងកម្លាំងប្រដាប់អាវុធ និងការងារផ្តល់សេវាសាធារណៈចាំបាច់ រួមមាន សេវាផ្គត់ផ្គង់អគ្គិសនី ទឹកស្អាត សេវាប្រមូល និងដឹកជញ្ជូនសំរាម-សំណល់រឹង, រាល់សកម្មភាពការងារ មុខរបរ ឬ អាជីវកម្ម ដែលដំណើរការតាមរយៈប្រព័ន្ធអនឡាញ, សេវាសង្គ្រោះបន្ទាន់ សេវាសុខាភិបាល និងឱសថស្ថាន, សកម្មភាពដឹកជញ្ជូនទំនិញចាំបាច់ និងសកម្មភាពការងារ មុខរបរ អាជីវកម្មចាំបាច់ដទៃទៀត ដែលទទួលបានការអនុញ្ញាតពីអាជ្ញាធរមានសមត្ថកិច្ច។
គួរបញ្ជាក់ថា ក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ១៩ នៅក្នុងភូមិសាស្ត្រដែលត្រូវបានបិទខ្ទប់ និងទប់ស្កាត់ជំងឺនេះមិនឲ្យឆ្លងរាលដាលទៅតំបន់ផ្សេងទៀត៕ដោយ៖ស តារា
រូបភាព៖ ទិដ្ឋភាពដែលអាជ្ញាធរចុះអនុវត្តវិធានការបិទខ្ទប់ក្នុងភូមិមួយចំនួននៅខណ្ឌមានជ័យ និងខណ្ឌពោធិ៍សែនជ័យ
