ខេត្តកណ្តាល ៖ បុរសម្នាក់ប្រកបរបររត់តាក់ស៊ីដឹកអ្នកដំណើរមិនសូវកាក់កបបានបែកគំនិតលួចជួញដូរគ្រឿងញៀន ត្រូវសមត្ថកិច្ចនគរបាលការិយាល័យប្រឆាំងគ្រឿងញៀនខេត្តកណ្តាលឃាត់ខ្លួន កាលពីវេលាម៉ោង១៨ និង៣៥នាទី ថ្ងៃទី១៦ ខែកក្កដា ឆ្នាំ២០១៥នៅចំណុចបេនឡានក្បែរផ្សារតាខ្មៅចាស់ ស្ថិតក្នុងភូមិតាខ្មៅ១ សង្កាត់/ក្រុងតាខ្មៅ ។ ក្នុងប្រតិបត្តិការបង្ក្រាបឃាត់ខ្លួនជនសង្ស័យខាងលើនេះ សមត្ថកិច្ចបានឈានទៅដល់ឆែកឆេរលំនៅឋានជនសង្ស័យដកហូតបានថ្នាំញៀនប្រភេទមេតំហ្វេតាមីន ហៅម៉ាទឹកកIce១កញ្ចប់ ទម្ងន់១១,២១ក្រាម (២,៩ជី)និងរថយន្ត១គ្រឿងម៉ាកកាមរីគូថហើម ស៊េរីឆ្នាំ១៩៩៦ ពណ៌ខ្មៅ ពាក់លេខភ្នំពេញ 2D-5824 ដើម្បីចាត់ការតាមច្បាប់ ។ មន្ត្រីនគរបាលការិយាល័យប្រឆាំងគ្រឿងញៀនខេត្តកណ្តាលបានឲ្យដឹងថា ជនសង្ស័យមានឈ្មោះ អៀង ស្រ៊ឺ ភេទប្រុស អាយុ៤០ឆ្នាំ ជនជាតិខ្មែរ មុខរបររត់ឡានតាក់ស៊ីតាខ្មៅ-ជ្រៃធំ មានទីលំនៅក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ។ ប្រភពដដែលបានបន្តថា ក្រោយពីនគរបាលស្រុកកោះធំឃាត់ខ្លួនជនសង្ស័យចែកចាយ និងជួញដូរគ្រឿងញៀនបានចំនួន៤នាក់ជាបន្តបន្ទាប់ក្នុងប្រតិបត្តិការពេញមួយយប់ថ្ងៃទី១៥រហូតដល់ទៀបភ្លឺថ្ងៃទី១៦ ខែកក្កដា ឆ្នាំ២០១៥រួចមក សមត្ថកិច្ចនគរបាលជំនាញបានធ្វើការសាកសួរចម្លើយទាំងនោះតាមជំនាញឈានដល់ក្តាប់បានមុខសញ្ញាជនសង្ស័យខាងលើនេះបន្ថែមទៀត ។ក្រោយពីក្តាប់បានមុខសញ្ញាជនសង្ស័យ ហើយនោះសមត្ថកិច្ចប៉ូលិសការិយាល័យប្រឆាំងគ្រឿងញៀនបានបន្តបើកប្រតិបត្តិការបង្ក្រាប ឈានដល់ឃាត់ខ្លួនជនសង្ស័យនៅចំណុចបេនឡានក្បែរផ្សារតាខ្មៅចាស់ យកមកធ្វើការសាកសួរនិងឆែកឆេរលំនៅឋានដកហូតបានវត្ថុតាងជាក់ស្តែង ។ នៅព្រឹកថ្ងៃទី១៧ ខែកក្កដា ឆ្នាំ២០១៥នេះសមត្ថកិច្ចនគរបាលការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តកណ្តាល បញ្ជូនខ្លួនជនសង្ស័យនិងវត្ថុតាងទៅកាន់សាលាដំបូងខេត្ត ដើម្បីចាត់ការតាមច្បាប់ ៕ស្អាងជ័យ
