លោក Barry Hearn បានលាលែងពីតំណែងជាប្រធានស្នូកឃើរពិភពលោក (Chairman of World Snooker) និងសាជីវកម្ម Darts Corporation (PDC) ក៏ដូចជាក្រុមហ៊ុនផ្សព្វផ្សាយកីឡាដ៏ធំមួយដែលលោកបានបង្កើតឡើងជិត៤០ឆ្នាំកន្លងមក។

សារព័ត៌មាន BBC Sport បានឲ្យដឹងថា បុរសវ័យ៧២ឆ្នាំរូបនេះកំពុងត្រូវបានជំនួសដោយកូនប្រុសរបស់លោកដែលជាអ្នកផ្សព្វផ្សាយកីឡាប្រដាល់ឈ្មោះ Eddie ជាប្រធានក្រុមហ៊ុន Matchroom Sport និង PDC ផងដែរ។

លោក Steve Dawson នឹងឡើងកាន់តំណែងជាប្រធានកីឡាស្នូកឃ័រពិភពលោកបណ្តោះអាសន្ននៅពេលការប្រកួតជើងឯកពិភពលោកបញ្ចប់នៅខែឧសភាខាងមុខនេះ។

លោក Hearn បាននិយាយថា “ខ្ញុំដឹងថាក្រុមហ៊ុនគឺស្ថិតក្នុងស្ថានភាពល្អ។ វាពិតជាកិត្តិយសណាស់ដែលបានធ្វើការជាមួយមនុស្សកីឡាឆ្នើមៗមួយចំនួននៅលើភពផែនដីក្នុងរយៈពេល៤០ឆ្នាំចុងក្រោយនេះ និងរីករាយនឹងបទពិសោធន៍អស្ចារ្យជាច្រើននៅលើវិសាលភាពនៃព្រឹត្តិការណ៍របស់យើងនាពេលនេះ” ។

លោក Hearn ដែលនឹងបន្តធ្វើជាប្រធានក្រុមផ្គូរផ្គងកីឡាក្នុងតួនាទីជាអ្នកប្រឹក្សាយោបល់បានបង្កើតក្រុមហ៊ុនផ្សព្វផ្សាយកាលពីឆ្នាំ១៩៨២ និងជាឧបករណ៍ក្នុងការប្រែក្លាយកីឡាស្នូកឃើឱ្យក្លាយជាកីឡាមួយដែលមានការចាប់អារម្មណ៍បំផុតនៅក្នុងចក្រភពអង់គ្លេស។

បន្ទាប់មកគាត់បានបន្តផ្សព្វផ្សាយព្រឹត្តិការណ៍ប្រដាល់ធំៗមួយចំនួនរបស់ប្រទេសអង់គ្លេសពីចុងទសវត្សឆ្នាំ១៩៨០ និងបានពង្រីកខ្លួនទៅជាកីឡាមួយចំនួនទៀតរួមមានកីឡាបាញ់ព្រួញ និងវាយកូនហ្គោល។ នៅខែមេសា ឆ្នាំ២០២០ លោកបានទទួលការវះកាត់បន្ទាប់ពីលោកបានគាំងបេះដូង ប៉ុន្តែបានជាសះស្បើយឡើងវិញនៅដើមឆ្នាំ២០២១នេះ។

កូនប្រុសរបស់លោក Barry Hearn ឈ្មោះ Eddie មានវ័យ៤១ឆ្នាំ បានដឹកនាំផ្នែកប្រដាល់របស់ក្រុមហ៊ុនអស់រយៈពេលជាច្រើនឆ្នាំរួចទៅហើយ ហើយបច្ចុប្បន្ននេះរួមជាមួយនឹងការទទួលយកជាប្រធាននៃក្រុមផ្គូរផ្គងកីឡានៃក្រុមហ៊ុនជាច្រើន គាត់បានដឹកនាំការប្រកួតប្រដាល់ Matchroom Boxing របស់អាមេរិក និងកីឡាវាយកូនហ្គោលរបស់ PGA EuroPro Tour ផងដែរ ៕ដោយៈភារៈ