ខេត្តកំពង់ចាម: ស្ថិតក្នុងបរិវេណវត្តទួលរកា នាព្រឹកថ្ងៃសៅរ៍ ១៣កើត ខែពិសាខ ឆ្នាំឆ្លូវ ត្រីស័ក ព.ស. ២៥៦៤ ត្រូវនឹងថ្ងៃទី២៤ ខែមេសាឆ្នាំ២០២១ យោងលើការចាំបាច់ និងបន្ទាន់បំផុត លោក វេង សាខុន ប្រធានក្រុមការងាររាជរដ្ឋាភិបាល និងជាប្រធានក្រុមការងារគណបក្សចុះមូលដ្ឋានស្រុកតំបែរ ខេត្តត្បូងឃ្មុំ ស្រុកកំពង់សៀម និងស្រុកជើងព្រៃ ខេត្តកំពង់ចាម រួមជាមួយលោក អ៊ុន ចាន់ដា អភិបាលនៃគណអភិបាលខេត្តកំពង់ចាម លោក ខ្លូត ផន ប្រធានក្រុមប្រឹក្សាខេត្ត លោក ចាន់ សុវុឌ្ឍ ប្រធានក្រុមការងារឃុំស្រក គណកម្មការកាកបាតក្រហមខេត្ត និងសហការីបានអញ្ជើញចុះមកពិនិត្យ និងវាយតម្លៃលើការខូចខាតផ្ទះសំបែងរបស់បងប្អូនប្រជាពលរដ្ឋនៅស្រុកកំពង់សៀម ឃុំស្រកចំនួន ៦៩ខ្នង (មានកម្រិតធ្ងន់ មធ្យម និងស្រាល) រួមទាំងដំបូលព្រះវិហារ សាលាសំណាក់ធម៌ ដំបូល និងផ្លាកសាលាឃុំ ដោយសារខ្យល់កន្រ្តាក់កាលពីថ្ងៃទី២២ និងបាននាំយកអំណោយជាគ្រឿងឧបភោគ បរិភោគ និងថវិកាមួយចំនួនទៀតមកចែកជូនបងប្អូនជនរង គ្រោះផ្ទាល់។
លោក ប៊ិន ឡាដា អភិបាលនៃគណអភិបាលស្រុក បានរាយការណ៍ជូនអង្គពិធីជ្រាបអំពីគ្រោះធម្មជាតិខ្យល់កន្ទ្រាក់ ដែលបានបំផ្លាញលំនៅដ្ឋានរបស់បងប្អូនប្រជាពលរដ្ឋ។ ទទួលបានព័ត៌មានទុក្ខលំបាកដែលបងប្អូនកំពុងប្រឈម លោកប្រធានក្រុមការងារបានបញ្ជាឲ្យអាជ្ញាធរមូលដ្ឋានរៀបចំចាត់ចែង និងផ្តល់ជំនួយឧបត្ថម្ភបឋម ហើយជាក់ស្តែងថ្ងៃនេះ លោកប្រធានក្រុមការងារ លោកអភិបាលខេត្ត និងសហការី បានអញ្ជើញចុះមកពិនិត្យ និងជួយសំណេះសំណាល់ជា មួយបងប្អូនផ្ទាល់ដើម្បីស្តាប់ និងទទួលយកបញ្ហាជាក់ស្តែង និងដោះស្រាយជូនជាជំហានៗទៅ តាមការចាំបាច់។ មានមតិសំណេះសំណាល ជាមួយបងប្អូនប្រជាពលរដ្ឋ លោកអភិបាលនៃគណអភិបាលខេត្ត បានថ្លែងអំណរគុណជូនចំពោះលោកប្រធានក្រុមការងារ អាជ្ញាធរមូលដ្ឋានគ្រប់លំដាប់ថ្នាក់ និងជាពិសេសសម្តេចកិត្តិព្រឹត្តបណ្ឌិត ប៉ុន រ៉ានីហ៊ុន សែន ដែលសម្តេចបានគិតគូអំពីសុខទុក្ខរបស់បងប្អូនដែលទទួលរងគ្រោះទាំង ៦៩គ្រួសារ ដោយបានជួយឧបត្ថម្ភជាស្បៀងសម្រាប់ទ្រទ្រង់ជីវភាពប្រចាំថ្ងៃ។ ដោយឡែក បើទោះបីមានការបិទខ្ទប់ដើម្បីទប់ស្កាត់ការរីករាល ដាលនៃជំងីឆ្លងកូវីដ-១៩ នៅរាជធានីភ្នំពេញយ៉ាងណាក៏ដោយ លោក វេង សាខុន ក្នុងនាមលោកជាប្រធានក្រុមការងារបានស្នើសុំអាជ្ញាធរមានសមត្ថកិច្ចដើម្បីធ្វើដំណើរមកកាន់ទីនេះក្នុងបំណងសំខាន់គឺចង់ជួប ចង់ឃើញ និងមកដោះស្រាយបញ្ហាជូនដោយផ្ទាល់ឲ្យបានទាន់ពេល។ សកម្មភាពដ៏ប្រពៃនេះ បានបង្ហាញពីការយកចិត្តទុកដាក់ និងគិតគូដោះស្រាយបញ្ហាជូនបងប្អូនបានទាន់ពេលវេលាដូចជា៖ គ្រោះថ្នាក់ចរាចរ រន្ទះបាញ់ ខ្យល់កន្រ្តាក់ ភ្លើងឆេះផ្ទះ បាក់ច្រាំងទន្លេ ជួយដល់ចាស់ជរា ក្មេងកំព្រា ជនពិការ និង ស្រ្តីមេមាយទីទាល់ក្រ ងាយរងគ្រោះ។ កាយវិការប្រកបដោយគុណធម៌ មនុស្សធម៌ គិតខ្វល់ខ្វាយ យកចិត្តទុកដាក់អំពីសុខទុក្ខរបស់ប្រជាពលរដ្ឋដ៏ប្រពៃនេះ និងជាពិសេសស្មារតីទទួលខុសត្រូវខ្ពស់ក្នុងនាមជាប្រធានក្រុមការងារចុះស្រុកកំពង់សៀម ធ្វើឲ្យប្រជាពលរដ្ឋមានក្តីរំភើប កក់ក្តៅ សប្បាយរីករាយ និងជឿជាក់លើការដឹកនាំរបស់ឯកឧត្តមប្រធាន និងសហការីក្រោមម្លប់សុខសន្តិភាព។
មានមតិសំណេះសំណាលជាមួយបងប្អូនជនរងគ្រោះ លោកក្នុងនាមថ្នាក់ដឹកនាំក្រុមការងារចុះជួយស្រុកកំពង់សៀម និងស្រុកជើងព្រៃ លោកបានពាំនាំនូវការផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែននាយករដ្ឋមន្រ្តី សម្តេចកិត្តិព្រឹត្តបណ្ឌិ មកជូនបងប្អូនដែលទទួលរងគ្រោះទាំង ៦៩គ្រួសារ មិនតែប៉ុណ្ណោះសម្តេចកិត្តិព្រឹត្តបណ្ឌិត តាមរយ:កាកបាតក្រហមខេត្តបាននាំយកគ្រឿងឧបភោគ បរិភោគមួយចំនួនមកចែកជូនដើម្បីជួយសម្រាលនូវទុក្ខលំបាកប្រចាំថ្ងៃរបស់បងប្អូន។ ភ្ជាប់ជាមួយជំនួយឧបត្ថម្ភនេះ លោកបានថ្លែងអំណរគុណ និងវាយតម្លៃខ្ពស់ចំពោះលោកអភិបាលនៃគណអភិបាលខេត្ត ស្រុក ឃុំ និងលោកប្រធានក្រុមការងារឃុំ សមាជិក រួមទាំងអាជ្ញាធរមូលដ្ឋានពាក់ព័ន្ធដែលបានយកចិត្ដទុកដាក់ គិតគូពីទុក្ខលំបាករបស់ប្រជាពលរដ្ឋក្នុងមូលដ្ឋានរបស់ខ្លួន និងជាពិសេសបានចុះដោះស្រាយបញ្ហាបានទាន់ពេលវេលា ហើយកាយ វិការសប្បុរសធម៌ និងវប្បធម៌ចែករំលែកនេះ បានបង្ហាញពីការទទួលខុសត្រូវខ្ពស់ចំពោះបញ្ហាជីវភាព សេចក្តីសុខទុក្ខប្រចាំថ្ងៃរបស់បងប្អូន។ ភ្ជាប់ទៅនឹងបញ្ហាគ្រោះធម្មជាតិនេះ លោកបានណែនាំឲ្យបងប្អូនប្រជាពលរដ្ឋត្រូវបង្កើនការប្រុងប្រយ័ត្នដើម្បីសុវត្ថិភាពផ្ទាល់ខ្លួន ការពារទ្រព្យ សម្បត្តិ និងអាយុជីវិត។ ស្ថិតក្នុងស្ថានភាពបច្ចុប្បន្ន លោកប្រធានបានណែនាំឲ្យបងប្អូនប្រជា ពលរដ្ឋត្រូវបង្កើនការថែរក្សាសុខភាព អនុវត្តឲ្យបានតាមការណែនាំរបស់ក្រសួងសុខាភិបាល និងជាពិសេសអនុវត្តឲ្យបានខ្ជាប់ខ្ជួននូវវិធានការ ៣ការពារ និង៣កុំ ដើម្បីបង្ការ និងទប់ស្កាត់ជំងឺឆ្លងកូវីដ-១៩ នៅមូលដ្ឋានរបស់ខ្លួនឲ្យបាន។
ក្រៅពីគ្រឿងឧបភោគ បរិភោគ លោកប្រធានក្រុមការងារបានជួយឧបត្ថម្ភថវិកាផ្ទាល់ខ្លួនបន្ថែម ចំនួន ៣០ ១០៩ ០០០រៀល ដើម្បីយកទៅចាត់ចែងបែងចែកជូនប្រជាពលរដ្ឋរងគ្រោះទាំង៦៩គ្រួសារ ដោយមួយគ្រួសារៗទទួលបានពី ២២ ០០០ រៀល ទៅ ២ ៥០០ ០០០ រៀល ដើម្បីជួសជុល ផ្ទះ ដំបូលព្រះវិហារ សាលាដំណាក់ធម៌ និងផ្លាកសាលាឃុំ និង ២ ៥០០ ០០០រៀលទៀត ទុកជូនអាជ្ញាធរស្រុកនិងឃុំសម្រាប់យកទៅចាត់ចែងតាមការចាំបាច់៕
ដោយ, សិលា
