ក្រុមតោខៀវ Chelsea បានឡើងទៅឈរចំណាត់ថ្នាក់លេខ៤បណ្តោះអាសន្ន ដែលជាចំណាត់ថ្នាក់ល្អមានឱកាសទៅលេងនៅ Champions League រដូវកាលក្រោយ ក្រោយពីយកឈ្នះក្រុមម្ចាស់ផ្ទះញញួរធំ West Ham ក្នុងលទ្ធផល១ទល់០ កាលពីរំលងអធ្រាត្រឈានចូលថ្ងៃទី២៥ ខែមេសា ឆ្នាំ២០២១។ នេះបើយោងតាមការចេញផ្សាយរបស់ BBC Sport ។
ក្នុងការប្រកួតនេះក្រុមភ្ញៀវ Chelsea បានគ្រប់គ្រងបាល់បានច្រើនជាងក្រុមម្ចាស់ផ្ទះ West Ham រហូតដល់៥៦ភាគរយ ខណៈដែល West Ham មានតែ៤៤ភាគរយទេ។ កីឡាករ Timo Werner គឺជាអ្នករកគ្រាប់បាល់ជ័យជម្នះ១គ្រាប់ នៅនាទីទី៤៣ ដោយការបញ្ជូនបាល់ពីកីឡាករ Ben Chilwell។
ជ័យជម្នះនេះធ្វើឲ្យក្រុមតោខៀវឡើងមកឈរចំណាត់ថ្នាក់លេខ៤ ជំនួស West Ham វិញ ដែលមាន៥៨ពិន្ទុក្នុង៣៣ប្រកួតនៅលីគកំពូលអង់គ្លេស លើសពិន្ទុក្រុម West Ham ៣ពិន្ទុ ដែលមាន៥៥ពិន្ទុ។ West Ham បានបរាជ័យ២ប្រកួតជាប់គ្នា ដែលឱកាសធ្វើឲ្យក្រុម Chelsea ដណ្តើមបានចំណាត់ថ្នាក់លេខ៤។
លទ្ធផលនេះបានធ្វើឲ្យគ្រូបង្វឹកតោខៀវលោក Thomas Tuchel ក្លាយជាអ្នកចាត់ការទូទៅទី២ក្នុងប្រវត្តិសាស្ត្រលីគកំពូលអង់គ្លេសដែលមិនស្គាល់ចាញ់សោះក្នុងការប្រកួតក្រៅដី១០លើកដំបូងរបស់គាត់ក្នុងការប្រកួតទាំងអស់ជាមួយក្លិប បន្ទាប់ពីលោក Claudio Ranieri ដែលធ្លាប់ដឹកនាំក្រុមLeicester City កាលពីឆ្នាំ២០១៥ (មិនស្គាល់ចាញ់សោះក្នុង១១ប្រកួតដំបូង)។ ចំណែកក្រុម West Ham បានចាញ់៤ប្រកួតក្នុងចំណោមការប្រកួតលីគចំនួន៨លើកកន្លងមក។
ងាកមកក្រុមអតីតម្ចាស់ជើងឯកចាស់ហង្សក្រហម Liverpool ហាក់ដូចជាដុនដាបនៅរដូវកាលនេះ ដោយការប្រកួតយប់មិញបានត្រឹមស្មើជាមួយក្រុមភ្ញៀវ Newcastle United ១ទល់១ប៉ុណ្ណោះ។
១គ្រាប់របស់ក្រុមហង្សក្រហម Liverpool រកបានដោយខ្សែប្រយុទ្ធសញ្ជាតិអេហ្ស៊ីប Mohamed Salah តាំងពីនាទីទី៣ម្ល៉េះក្នុងការប្រកួតតង់ទី១ ប៉ុន្តែអ្វីៗត្រូវបានប្រែប្រួល ដោយសារកីឡាករក្រុមហង្សក្រហមទប់លែងបាន រហូតដល់ម៉ោងបន្ថែម៩០+៥ កីឡាករ Joe Willock របស់ក្រុម Newcastle United ។
លទ្ធលនេះនេះធ្វើឲ្យក្រុមរបស់លោក Jurgen Klopp ធ្លាក់ដល់លេខ៦មាន៥៤ពិន្ទុ ដែលកាន់តែបាត់បង់ឱកាសប្រជែងយកតំណែង Top 4 ដែលមានកៅអីទៅលេង Champions League រដូវកាលក្រោយ។
ការរង់ចាំរយៈពេល៣០ឆ្នាំរបស់ក្រុមហង្សក្រហម Liverpool បានឈានដល់ទីបញ្ចប់ ហើយកាលពីឆ្នាំមុនក្រុមរបស់លោក Klopp ធ្វើបានល្អ ខណៈដែលក្រុមនេះបានឈ្នះ១៨ប្រកួតក្នុងចំណោម១៩ប្រកួត។ ក្រុមហង្សក្រហមបាននាំមុខ១៨ពិន្ទុលើក្រុម Manchester City កាលពីរដូវកាលមុន ប៉ុន្តែបែរជាចាញ់ក្រុមលោក Pep Guardiola រហូតដល់៣០ពិន្ទុវិញក្នុងថ្ងៃដំណាលគ្នា នៅរដូវកាលនេះ ។
ទោះបីជាទទួលបានលទ្ធផលស្មើ៩០នាទីក៏ដោយ ក៏ក្រុម Liverpool បានបន្តការមិនស្គាល់ចាញ់របស់ខ្លួននៅពេលប្រកួតជាមួយ Newcastle នៅ Premier League ក្នុងចំណោម២៥ប្រកួត (ឈ្នះ២០ប្រកួត ស្មើ៥ប្រកួត) ។
ក្រុមហង្សក្រហម Liverpool បានរក្សាគូប្រកួតមិនឲ្យស៊ុតបញ្ចូលទី (clean sheets) បានតែ៣ដងប៉ុណ្ណោះនៅ Premier League រដូវកាលនេះ ដោយទទួលបានលទ្ធផលយ៉ាងហោចណាស់ម្តងក្នុងចំណោម៨ប្រកួតចុងក្រោយរបស់ពួកគេនៅឯកីឡដ្ឋាន Anfield ដែលជាទឹកដីក្រុមនេះផ្ទាល់ ៕
ដោយ៖ ភារៈ(រូបថត៖ BBC Sport)
