ខេត្តរតនគិរី៖ មានករណីគ្រោះថ្នាក់ចរាចរណ៍មួយបានកើតឡើងដោយសារតែរថយន្តបើកបុកម៉ូតូពីក្រោយហើយបើករត់គេចបាត់ភ្លាមៗ ឯជនរងគ្រោះសន្លប់មិនដឹងខ្លួន ពេលនេះកំពុងសង្គ្រោះបន្ទាន់ក្នុងមន្ទីរពេទ្យ។

ករណីគ្រោះថ្នាក់ចរាចរណ៍បណ្តាលឱ្យជនរងគ្រោះសន្លប់ស្តូកស្តឹងនោះបានកើតឡើងនៅវេលាម៉ោង១៧ៈ០៧នាទីថ្ងៃទី២៦មេសាឆ្នាំ២០២១ត្រង់ចំណុចមុខចម្ការម្រេចលោកហួត រិទ្ធី ស្ថិតក្នុងភូមិកាតែ ឃុំម៉ាលិក ស្រុកអណ្ដូងមាស ខេត្តរតនគិរី។

ប្រភពពីសមត្ថកិច្ចចរាចរណ៍បានឱ្យដឹងថាករណីនោះបង្កឡើងដោយរថយន្តបុកម៉ូតូពីក្រោយក្នុងទិសដៅស្របគ្នាពីជើងទៅត្បូង។ ជនរងគ្រោះឈ្មោះមាស សុខជាភេទប្រុស អាយុ១៨ឆ្នាំ ជនជាតិខ្មែរ មុខរបរគ្រូបង្រៀន(គ្រូជាប់កិច្ចសន្យា)នៅបឋមសិក្សាកិះចុង មានទីលំនៅភូមិលោមឃុំម៉ាលិក ជិះម៉ូតូម៉ាកហុងដាឌ្រីម C១២៥ ពណ៌ខ្មៅ ពាក់ស្លាកលេខរតនគិរី1F-2865បានរងការខូចខាត
មួយកំណាត់មុខទាំងស្រុង ហើយត្រូវបានផ្នែកជំនាញយកទៅរក្សាទុកនៅអធិការដ្ឋាននគរបាលស្រុកអណ្តូងមាស។

ជនរងគ្រោះរងរបួសធ្ងន់សន្លប់បាត់ស្មារតីត្រូវបានរថយន្តសង្រ្គោះរបស់មណ្ឌលសុខភាពស្រុកអណ្ដូងមាសដឹកយកទៅសង្ត្គ្រោះនៅមណ្ឌលសុខភាពស្រុកបរកែវ។
ចំណែកឯរថយន្តបង្កបានបើករត់គេចបាត់ភ្លាមៗបន្ទាប់ពីកើតហេតុ។

ពេលនេះកម្លាំងជំនាញកំពុងបន្តស្រាវជ្រាវរករថយន្តនោះមកធ្វើការដោះស្រាយតាមច្បាប់៕

ដោយ៖ ជីវ័ន្ត