ខេត្តកំពង់ចាម៖ លោក អ៊ុន ចាន់ដា អភិបាលខេត្តកំពង់ចាម បានថ្លែងឲ្យដឹងថា ខេត្តកំពង់ចាម បេីគិតត្រឹមព្រឹកថ្ងៃទី២៩ ខែមេសា ឆ្នាំ២០២១នេះ មានអ្នកឆ្លងជំងឺកូវីដ-១៩ សរុបចំនួន៨២នាក់ហើយ ក្នុងនោះអ្នកវិជ្ជមានកូវីដចំនួន ៦៦នាក់ ឆ្លងចេញពីព្រឹត្តិការណ៍សហគមន៍២០កុម្ភៈ។
លោក អ៊ុន ចាន់ដា ថ្លែងបន្តថា ក្នុងចំណោមអ្នកឆ្លងទាំង៨២នាក់នេះ មានចំនួន២៥នាក់ដែលបានព្យាបាលជាសះស្បើយ។ បច្ចុប្បន្ន អ្នកកំពុងធ្វើចត្តាឡីសក័សរុប ៧០២នាក់ ក្នុងនោះ (ស្រី៣៣២នាក់) មាននៅសាលាគរុកោសល្យ ៤៨២នាក់, មន្ទីរពេទ្យស្រីសន្ធរ ៥៤នាក់ និងនៅតាមផ្ទះ ១៦៦នាក់។
ជាក់ស្ដែង រដ្ឋបាលខេត្តកំពង់ចាម នៅព្រឹកថ្ងៃព្រហស្បតិ៍ទី២៩ ខែមេសានេះ ក៏បានប្រកាសពីការរកឃើញអ្នកឆ្លងជំងឺកូវីដ១៩ ថ្មីចំនួន៣៩នាក់បន្ថែមទៀត នៅស្រុកបាធាយ, ស្រុកកងមាស និងស្រុកស្រីសន្ធរ ដែលសុទ្ធតែចេញពីចង្កោមរោងចក្រ Six Plus និងរោងចក្រ 7NG។
បន្ថែមពីនេះ រដ្ឋបាលខេត្តកំពង់ចាម ក៏បានដាក់ចេញវិធានការបន្ទាន់ សម្រេចបិទខ្ទប់រយៈពេល១៤ថ្ងៃ នៅទីតាំងភូមិ ឃុំមួយចំនួនដែលពាក់ព័ន្ធករណីវិជ្ជមានជំងឺកូវីដ១៩ខាងលើ ដើម្បីទប់ស្កាត់ការឆ្លងរីករាលដាល នៃជំងឺកូវីដ១៩ ទៅសហគមន៍ផ្សេងទៀត ក្នុងនោះរួមមាន ដូចខាងក្រោមនេះ៖
ទី១; ស្រុកកងមាស មានដូចជា៖ ឃុំកងតាណឹង, ឃុំស្ដៅ និងឃុំរកាអារ និងភូមិគងជ័យ អន្លង់គគី ឃុំព្រែកកុយ។
ទី២; ស្រុកបាធាយ៖ ភូមិកំពង់ព្រះ និងភូមិជើងឆ្នុក ឃុំតាំងក្រាំង, ភូមិចុង និងភូមិសង្កើប ឃុំសំបូរ, ភូមិតាំងក្រាំង ឃុំជាលា។
និងទី; ស្រុកស្រីសន្ធរ៖ ឃុំប្រាំយ៉ាម (មាន៤ភូមិ), ភូមិសន្ទៃ ភូមិច្រស់ ឃុំព្រែកពោធិ៍ និងភូមិជ័យ ឃុំមានជ័យ៕ដោយ៖សហការី
