យ៉ាងហោចណាស់ក៏មានមនុស្ស២៥នាក់ស្លាប់ ក្នុងការបាញ់ប្រហារ រវាងកម្លាំងប៉ូលិសនិង ក្រុមជួញដូរគ្រឿងញៀន ស្ថិតនៅតំបន់អនាធិបតេយ្យ ក្នុងទីក្រុង Rio De Jainero ប្រទេសប្រេស៊ីល។
សារព័ត៌មានរ៉យទ័របានផ្សាយថា យ៉ាងហោចណាស់ ក៏មានមនុស្ស២៥នាក់ស្លាប់ ក្នុងការបាញ់ប្រហារគ្នារវាងកម្លាំងសន្តិសុខនៅក្រុមជួញដូរគ្រឿងញៀន។ ស្នងការប៉ូលិសទីក្រុង Rio de Janeiro បានឲ្យដឹងថា ជនរងគ្រោះស្លាប់មានប៉ូលិសម្នាក់ ក្រៅពីនេះគឺក្រុមជួញដូរគ្រឿងញៀន ស្ថិតនៅតំបន់អនាធិបតេយ្យ។
មនុស្សជាច្រើនបានព្យាយាមរត់គេចចេញពីតំបន់អនាធិបតេយ្យ ពេលប៉ូលិសចូលមកដល់។ កម្លាំងប៉ូលិសបានប្រើប្រាស់ឧទ្ធម្ភាគចក្រនិង រថពាសដែកចូលទៅកម្ចាត់ក្រុមជួញដូរគ្រឿងញៀនបង្កឲ្យមានការប៉ះទង្គិចគ្នាយ៉ាងខ្លាំង។
នៅក្នុងសន្និសីទកាសែត កម្លាំងប៉ូលិស Rio de Janeiro បានប្រកាសថា មានជនសង្ស័យ១០នាក់ត្រូវបានចាប់ខ្លួន ហើយដកហូតបានអាវុធជាច្រើន ក្នុងនោះមានកាំភ្លើងខ្លី ១៥ដើម កាំភ្លើងយន្តមួយដើម គ្រាប់បែក ១៤គ្រាប់។
សារព័ត៌មានរ៉យទ័រ បានផ្សាយថា នេះគឺជាការបោសសម្អាតគ្រឿងញៀនទ្រង់ទ្រាយធំបំផុត មិនធ្លាប់មានក្នុងរយៈពេល ១៦ឆ្នាំកន្លងមក នៅទីក្រុង Rio de Janeiro ដែលជាតំបន់រងផលប៉ះពាល់ខ្លាំងបំផុតដោយសារតែការជួញដូរគ្រឿងញៀន៕ ដោយ៖ សាធី

រូបភាព៖Reuters