ភ្នំពេញ៖ បេីយោងតាមទីភ្នាក់ងារសារព័ត៌មានវៀតណាម បានរាយការណ៍ថា ប្រទេសកម្ពុជា បាននាំចេញនៅក្នុងទឹកប្រាក់ចំនួនប្រមាណជា ១,៤៧ ពាន់លានដុល្លារទៅប្រទេសវៀតណាមក្នុងត្រីមាសទី ១ឆ្នាំនេះ។ ពោលគឺមានការ កើនឡើងប្រមាណជា ៤៤៣ ភាគរយបើប្រៀបធៀបទៅនឹងរយៈពេលដូចគ្នា កាលពីឆ្នាំមុន។
ជាក់ស្ដែងទីភ្នាក់ងារសារព័ត៌មានវៀតណាម បន្តថា ពាណិជ្ជកម្មទ្វេភាគីរវាងកម្ពុជា និងវៀតណាមបានកើនឡើង ១០៣ ភាគរយស្មើនឹង ២,៦៩ ពាន់លានដុល្លារអាមេរិក។
របាយការណ៍ដដែល អះអាងបន្ថែមថា ចំពោះការនាំចេញរបស់វៀតណាម មកកម្ពុជា បានកើនឡើង ១៥,៨៣ ភាគរយស្មើនឹង ១,២២ពាន់លានដុល្លារអាមេរិក។
សូមជម្រាបថា ផលិតផលសំខាន់ៗរបស់កម្ពុជា ដែលនាំចេញទៅប្រទេសវៀតណាមក្នុងរយៈពេលនេះគឺគ្រាប់ស្វាយចន្ទី ៧១១ លានដុល្លារកើនឡើង ៤៩៧ ភាគរយ ; កៅស៊ូ ៣១៨,៣ លានដុល្លារកើនឡើង ៩៩៩ ភាគរយ ; បន្លែ ១៣,៣ លានដុល្លារកើនឡើង ៤៨,២ ភាគរយ និងដែកអេតចាយមានតម្លៃ ១០,៧ លានដុល្លារកើនឡើង ២១៦,៧ ភាគរយ។
ដោយឡែកផលិតផលសំខាន់ៗ ដែលកម្ពុជា នាំចូលពីប្រទេសវៀតណាមភាគច្រើន គឺជាដែក និងដែកថែបកើន ២០,៨ ភាគរយ;សម្លៀកបំពាក់ ១៥,៥ ភាគរយ ;ប្រេងនិងឧស្ម័ន ១៨,៤ ភាគរយ សម្លៀកបំពាក់ និងស្បែកជើង ១០,៦ ភាគរយ៕ដោយ៖សហការី
រូបភាព៖ឯកសារ
