ខេត្តកណ្តាល៖ បុរសម្នាក់ធ្វើសកម្មភាពចែកចាយគ្រឿងញៀនត្រូវបានសមត្ថកិច្ចនគរបាលចាប់ខ្លួន ដកហូតថ្នាំញៀនប្រភេទមេតំហ្វេតាមីនចំនួន២កញ្ចប់ដើម្បីកសាងសំណុំរឿងចាត់ការតាមច្បាប់ ។
ករណីនេះធ្វើឡើងកាលពីវេលាម៉ោង១០និង៣០នាទីយប់ ថ្ងៃទី១៤ ខែមីនា ឆ្នាំ២០១៦ នៅលើកំណាត់ផ្លូវលេខ៣៨០ ស្ថិតក្នុងភូមិព្រែកល្វា ឃុំព្រែកតាកូវ ស្រុកខ្សាច់កណ្តាល ខេត្តកណ្តាល ។
ប្រភពពីសមត្ថកិច្ចមូលដ្ឋានបានឲ្យដឹងថា ជនសង្ស័យដែលត្រូវបានចាប់ខ្លួនឈ្មោះ ហ៊ន រដ្ឋា ហៅរដ្ឋ អាយុ២៧ឆ្នាំ មុខរបរកសិករ ជនជាតិខ្មែរ មានទីលំនៅក្នុងភូមិព្រែកល្វា ឃុំព្រែកតាកូវ ស្រុកខ្សាច់កណ្តាល ខេត្តកណ្តាល ។
ប្រភពបានបន្តថា នៅមុនពេលឃាត់ខ្លួនជនសង្ស័យខាងលើនេះសមត្ថកិច្ចនគរបាលស្រុកខ្សាច់កណ្តាល សហការជាមួយនគរបាលប៉ុស្តិ៍រដ្ឋបាលចុះល្បាតតាមបណ្តោយផ្លូវលេខ៣៨០ ខណៈនោះបានប្រទះឃើញជនសង្ស័យ សមត្ថកិច្ចបានហៅឲ្យឈប់ឆែកឆេររកឃើញថ្នាំញៀន ទើបសមត្ថកិច្ចឃាត់ខ្លួនបញ្ជូនទៅកាន់អធិការដ្ឋាននគរបាលស្រុក ដើម្បីកសាងសំណុំរឿងចាត់ការតាមនីតិវិធី៕ ស្អាងជ័យ
