ភ្នំពេញ ៖ បុរសម្នាក់បានបេីករថយន្តដឹកទំនិញធុនធំមិនប្រយ័ត្នជ្រុលទៅបុករថយន្តស៊េរីទំនេីប Mazda ពីក្រោយពេញទំហឹងបណ្ដាលឲ្យរងការខូចខាតយ៉ាងដំណំ។ ហេតុការណ៍នេះបង្កការកកស្ទះចរាចរណ៍ដល់អ្នកដំណេីរកាលពីវេលាម៉ោង៨និង៤០នាទីយប់ថ្ងៃទី១៤ ខែមិថុនា ឆ្នាំ២០២១ នៅចំណុចភ្លើងស្តុបចំការមន តាមបណ្ដោយផ្លូវសុធារស កែងផ្លូវព្រះនរោត្ដម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុមានរថយន្តស៊េរីទំនេីប Mazda ពណ៌សំបកឪឡឹក ពាក់ស្លាកលេខភ្នំពេញ 2AB-8801 បេីកបរដោយបុរសម្នាក់ជាជនជាតិចិន ធ្វេីដំណេីរតាមបណ្ដោយផ្លូវព្រះសុធារសក្នុងទិសដៅពីកេីតទៅលិច ខណៈមកដល់ចំណុចកេីតហេតុក៏បានឈប់ភ្លើងស្តុប ពេលនោះក៏មានរថយន្តNiSSAN ចង្កូតស្ដាំ ពណ៌ស ប្រភេទដឹកទំនិញធុនធំបេីកបរដោយបុរសម្នាក់ជាជនជាតិខ្មែរ ធ្វេីដំណេីរស្របទិសគ្នាហេីយមកបុកពីក្រោយរថយន្តម៉ាស្តាពេញទំហឹង បណ្ដាលឲ្យបែកកញ្ចក់និងក្រពិឹតកាងខាងក្រោយ រងការខូចខាតយ៉ាងដំណំ តែមិនប៉ះពាល់ដល់មនុស្សឡេីយ ។
ក្នុងករណីខាងលេីនេះក៏មានការកកស្ទះចរាចរណ៍ដល់បងប្អូនប្រជាពលរដ្ឋជាខ្លាំងផងដែរ។ ក្រោយមកសមត្ថកិច្ចមូលដ្ឋានបានចុះមកដល់ហេីយទាក់ទងទៅជំនាញចរាចរណ៍ឲ្យមកធ្វេីការវាស់វែងយករថយន្តទាំងពីរគ្រឿងនេះទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ រង់ចាំភាគីទាំងសងខាងដោះស្រាយគ្នានាពេលក្រោយ ៕
ដោយ ៖ ភារ៉ា ដង្កោ
