ខេត្តកំពង់ឆ្នាំង៖ ក្មេងស្រីម្នាក់បានស្លាប់ និងមនុស្ស៤នាក់ផ្សេងទៀតបានរងរបួសធ្ងន់ស្រាល បន្ទាប់ពីត្រូវរថយន្តក្រុងដឹកអ្នកដំណើរមួយគ្រឿងបានបើកបុកម៉ូតូរ៉ឺម៉ក។

ហេតុការណ៍នេះបានកើតឡើងកាលពីវេលាម៉ោង ១០ និង២០នាទីព្រឹក ថ្ងៃទី១៥ ខែមិនា ឆ្នាំ២០១៦ នៅលើផ្លូវជាតិលេខ៥ ដែលស្ថិតនៅក្នុង ភូមិត្រពាំងចឹកសារ សង្កាត់កំពង់ឆ្នាំង ក្រុងកំពង់ឆ្នាំង នៅក្បែរូបសំណាកឆ្នាំងមាស ។

សមត្ថកិច្ចបានអោយដឹងទៀតថា ជនរងគ្រោះនៅក្នុងឧប្បត្តិហេតុគ្រោះថ្នាក់ចរាចរណ៍នេះ ទី១.ឈ្មោះខុន សុវណ្ណា ភេទស្រី អាយុ៨ខែ ស្លាប់ពេលបញ្ជូនដល់មន្ទីរពេទ្យ ទី២.ឈ្មោះ ផាន់ សម្បតិ្ត អាយុ១៧ឆ្នាំ រងរបួសធ្ងន់បាក់ជើងខាងឆ្វេង ទី៣.ឈ្មោះ ស្រ៊ីម តយ អាយុ១៧ឆ្នាំ ឈ្មោះ ថន សុខខៃ អ្នកបើកម៉ូតូ និង៤.ឈ្មោះ ស៊ន ចាន់ស៊ី អាយុ២៨ឆ្នាំជាប្រពន្ធ ពួកគេមានទីលំនៅ ភូមិកំពង់ខ្លាញ់ ឃុំជលសារ ស្រុកជលគីរី ។

សមត្ថកិច្ចនគរបាលក្រុងកំពង់ឆ្នាំងបានអោយដឹងថា មុនពេលកើតហេតុ មានម៉ូតូមួយគ្រឿង ម៉ាក ស៊ុយហ្យុយគីស្មាស់រីវ៉ូ ពាក់ស្លាកលេខតាកែវ ១B.៥៨៧៥ បាននសណ្តោងរ៉ឺម៉កពីក្រោយដែលមានមនុស្សជិះសរុប៤នាក់ ក្នុងដំណើរពីត្បូងទៅជើង ។ លុះពេលមកដល់ចំណុចកើតហេតុ ស្រាប់តែមានរថយន្តក្រុងមួយគ្រឿងពាក់ ស្លាកលេខ ភ្នំ ពេញ ៣D-៤០៨២ ​បើកបរ ក្នុងដំណើរក្នុងទិសច្រាស់គ្នា បានព្យាយាមបើកជែងវ៉ារថយន្តមួយគ្រឿងទៀតនៅពីមុខ រួចក៏ជ្រុលទៅម៉ូតូសណ្តោងរ៉ឺម៉ក យ៉ាងពេញទំហឹងតែម្តង បណ្តាលអោយអ្នកជិះរ៉ឺម៉កទាំង៤នាក់ រងរបួសធ្ងន់ស្រាលហើយត្រូវបានដឹក ទៅសង្គ្រោះនៅមន្ទីរពេទ្យខេត្ត តែដោយរបួសធ្ងន់ធ្ងរកុមារីអាយុ៨ខែម្នាក់បានស្លាប់នៅក្នុងមន្ទីរពេទ្យខេត្ត ។

ក្រោយពេលកើតហេតុរថយន្តក្រុងបានបើករត់គេចតែត្រូវសមត្ថកិច្ចស្ទាក់ចាប់បាននៅស្រុករលាប្អៀរ ហើយត្រូវបានយករក្សាទុកនៅការិយាល័យចរាចរណ៍ផ្លូវគោកខេត្ត ដើម្បីរង់ចាំធ្វើការដោះស្រាយតាមនីតិវិធី ៕

ដោយ៖ ចន្ថា