អន្តរជាតិ៖ បើតាមទីភ្នាក់ងារសារព័ត៌មាន Bloomberg នៅព្រឹកថ្ងៃចន្ទ ទី២១ ខែមិថុនា ឆ្នាំ២០២១នេះ បានចុះផ្សាយថា បន្ទាប់ពីប៉ូលីសហុងកុង បានចាប់ឃាត់ខ្លួន និពន្ធនាយកកាសែតគាំទ្រលទ្ធិប្រជាធិបតេយ្យ Apple Daily នៅហុងកុង ជាច្រើននាក់ និងបង្កគណនីធនាគារថែមទៀតនោះ។ ពេលនេះក្រុមប្រឹក្សាភិបាលក្រុមហ៊ុន ណិច ឌីជីថល (Next Digital) ដែលជាម្ចាស់កាសែត Apple Daily នឹងត្រូវជួបប្រជុំគ្នានៅថ្ងៃចន្ទនេះដែរ ដើម្បីពិភាក្សាគ្នាថាតើត្រូវបិទ កាសែតមួយនេះ ដែរឬមួយក៏យ៉ាងណា។
សេចក្ដីរាយការណ៍របស់សារព័ត៌មាន Bloomberg បាននិយាយបន្ថែមថា ដោយផ្អែកលើប្រភពបានមកពីលោក ម៉ាក សាយមិន (Mark Simon) ជាទីប្រឹក្សាជាន់ខ្ពស់ស្ថាបនិកកាសែត Apple Daily លោក ជីមមី ឡៃ (Jimmy Lai)។ លោក Mark Simon គូសបញ្ជាក់ថា ក្រុមមន្ត្រីសន្តសុខទីក្រុងហុងកុង បានបិទគណនីធនាគាររបស់កាសែត Apple Daily ដែលនេះប្រហែលជាធ្វើឱ្យកាសែតមួយនេះ ត្រូវបិទការចេញផ្សាយ និងប្រតិបត្តិការប្រព័ន្ធឌីជីថលរបស់ខ្លួន។
គួររម្លឹកផងដែរថា ប៉ូលីសហុងកុង កាលពីថ្ងៃព្រហស្បតិ៍សបា្ដហ៍មុន បានឃាត់ខ្លួនបុគ្គលិកជាន់ខ្ពស់ ០៥រូប មកពីកាសែត Apple Daily និងបានបង្កគណនីធនាគារកាសែត មួយនេះដែលមានប្រាក់ប្រមាណ ១៨លានដុល្លារហុងកុង។ ចំពោះការចាប់ខ្លួនទ្រង់ទ្រាយធំនេះត្រូវបានធ្វើឡើង ក្រោយពីមានការចោទប្រកាន់ថា ពួកគេទាំងនេះបានគប់គិតជាមួយបរទេស៕ដោយ៖ស តារា
