ភ្នំពេញ៖ អគ្គីភ័យមួយបានឆាប់ឆេះផ្ទះប្រជាពលរដ្ឋមួយកន្លែង បណ្តាលឱ្យខូចខាតទ្រព្យសម្បត្តិអស់មួយចំនួនធំ ហើយប៉ុន្តែមិនបណ្តាលឱ្យរាលដាលដល់ផ្ទះប្រជាពលរដ្ឋនៅជិតខាងនោះ។
ដែលហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង១១នឹង៣០នាទីយប់ថ្ងៃទី១៦ ខែមីនា ឆ្នាំ២០១៦ តាមបណ្តោយផ្លូវលេខ៣៣៦ ស្ថិតក្នុងសង្កាត់បឹងសាឡាង ខណ្ឌទួលគោក។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញមានផ្សែងហុយចេញយ៉ាងខ្លាំងចេញពីផ្ទះកើតហេតុ មួយសន្ទុះក្រោយមកក៏មានសម្លេងស្រែកឆោឡោឡើងឱ្យជួយ ហើយម្ចាស់ផ្ទះនិងកូនៗបាននាំគ្នារត់ចេញពីខាងក្នុងផ្ទះ ដោយមានទាំងភ្លើងបាននឹងកំពុងឆាបឆេះផ្ទះបាត់ទៅហើយ ។ ប្រជាពលរដ្ឋដែលនៅក្បែរខាងបាននាំគ្នាស្លន់ស្លោរបង្កការភ្ញាក់ផ្អើល ជួយយកទឹកជះ និងបាញ់ពន្លត់ តែអគ្គីភ័យឆាឆេះខ្លាំងពេកក៏បានទំនាក់ទំនងទៅសមត្ថកិច្ច ហើយភ្លាមៗនោះ រថយន្តអគ្គីភ័យបានមកអន្តរាគមន៍បាញ់ពន្លត់ផងដែរ តែដោយសារតែផ្លូវតូចចង្អៀតរថយន្តពិបាកចូល ហើយអគ្គីភ័យឆេះគួរសមដែរនោះ កម្លាំងពន្លត់អគ្គីភ័យបានប្រើប្រាស់ពេលប្រមាណជាង១ម៉ោង ទើបអាចគ្រប់គ្រងស្ថានការបានទាំងស្រុង មិនឱ្យរាលដាល់ដល់ផ្ទះប្រជាពលរដ្ឋក្បែរនោះ ។ ចំពោះទំហំនៃការខូចខាតគឺបន្ទប់ជួលខាងក្រោម៥បន្ទប់ ដែលមានសម្ភារៈប្រើប្រាស់ទុកនៅខាងក្នុងខូចខាតស្ទើរទាំងស្រុង ឆេះម៉ូតូម៉ត់អស់៥គ្រឿង ខូចខាតផ្ទះមួយចំនួន តែមិនទាន់ដឹងថាមានតំលៃប៉ុន្មាននៅឡើយទេ ហើយក៏មិនបណ្តាលឱ្យនណារម្នាក់គ្រោះថ្នាក់ដល់អាយុជីវិតនោះទេ គ្រាន់តែមានស្រ្តីម្នាក់ដួលសន្លប់ដោយសារតែមានផ្ទះនៅក្បែរកើតហេតុ ហើយខ្លាចឆ្លងមកដល់ផ្ទះកាត់តែប៉ុណ្ណោះ ។
ក្នុងករណីអគ្គីភ័យខាងលើនេះ គឺសមត្ថកិច្ចសន្និដ្ឋានថាអាចបណ្តាលមកពីឆ្លងចរន្តអគ្គីសនី ទុស្សេខ្សែភ្លើង ទើបបណ្តាលឱ្យមានគ្រោះថ្នាក់ដូច្នេះ ៕
ដោយ៖ ព្រែកជ័យ
