ខេត្តស្ទឹងត្រែង, នៅរសៀលថ្ងៃទី២៥ ខែមិថុនា ឆ្នាំ២០២១ សេចក្ដីសម្រេចស្ដីពីការអនុវត្តវិធានការដ្ឋបាល បិទខ្ទប់ ចំនួន ៣ទីតាំងក្នុងក្រុងស្ទឹងត្រែង ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។

-ការបិទខ្ទប់ជាបណ្តោះអាសន្នទីតាំងអាហារដា្ឋន “ វិមានមាស” ស្ថិតនៅក្នុងភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង។
-ការបិទខ្ទប់ជាបណ្តោះអាសន្នទីតាំងភោជនីយដ្ឋាន “កាឡាក់ស៊ី” ស្ថិតនៅក្នុងភូមិស្រែពោធិ៍ សង្កាត់ស្រះឫស្សី ក្រុងស្ទឹងត្រែង ខេត្តស្ទឹងត្រែង។
-ការបិទខ្ចប់ជាបណ្តោះអាសន្នទីតាំងអាហារដ្ឋាន “ស្រីមៀ” ស្ថិតនៅក្នុងភូមិកណ្តាល សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង។
ការបិទខ្ទប់ជាបណ្តោះអាសន្នទីតាំងមូលដ្ឋាន ដែលបានរកឃើញមានករណីវិជ្ជមានជំងឺកូវីដ-១៩នេះ មានគោលបំណងដើម្បីទប់ស្កាត់ការឆ្លងរាលដាលនៃជំងឺកូវីដ-១៩ក្នុងសហគមន៍ ធានាការពារបានអាយុជីវិត ប្រជាជន សុខភាពសាធារណៈ និងសន្តិសុខសុវត្ថិភាពសង្គម។
ក្នុងអំឡុងពេលបិទខ្ទប់ជាបណ្តោះអាសន្ននូវអាហារដ្ឋាន ខាងលើ សង្កាត់ ស្ទឹងត្រែង ក្រុងស្ទឹងត្រែង ខេត្តស្ទឹងត្រែង អាជ្ញាធរមានសមត្ថកិច្ចពាក់ព័ន្ធក្នុងខេត្តស្ទឹងត្រែង ត្រូវ៖

– ហ៊ុំព័ទ្ធទីតាំងអាហារដ្ឋាន ដូចបានកំណត់ខាងលើ – ផ្អាកការចេញ-ចូលទីតាំងនេះ

– អ្នករស់នៅ និងអ្នកដែលមានការប៉ះពាល់នឹងអ្នកវិជ្ជមានជំងឺកូវីដ-១៩ក្នុងទីតាំងនេះចាប់ពីថ្ងៃទី ០៩ ខែមិថុនា ដល់ថ្ងៃទី២៤ ខែមិថុនា ឆ្នាំ២០២១ ត្រូវធ្វើចត្តាឡីស័ក និងធ្វើតេស្តសំណាកវិភាគ រកជំងឺកូវីដ-១៩

– បន្តស្រាវជ្រាវរកអ្នកដែលមានការពាក់ព័ន្ធផ្ទាល់ និងប្រយោលដើម្បីយកសំណាកវត្ថុវិភាគ និងធ្វើចត្តាឡីស័ក

– អនុវត្តវិធានការពិន័យអន្តរការណ៍តាមច្បាប់ លិខិតបទដ្ឋានគតិយុត្តជាធរមាន ចំពោះបុគ្គលណា ដែលមិនគោរពដោយចេតនានូវវិធានការរដ្ឋបាល និងវិធានការសុខាភិបាលរបស់រាជរដ្ឋាភិបាល ក្នុងការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះ ថ្នាក់ធ្ងន់ធ្ងរផ្សេងទៀត ដោយមិនទាន់គិតដល់បទល្មើសព្រហ្មទណ្ឌផ្សេងទៀត។
បទប្បញ្ញត្តិទាំងឡាយណា ដែលមានខ្លឹមសារផ្ទុយនឹងសេចក្តីសម្រេចនេះ ត្រូវទុកជានិរាករណ៍។
នាយករដ្ឋបាលសាលាខេត្ត ស្នងការនៃស្នងការដ្ឋាននគរបាលខេត្ត មេបញ្ជាការនៃបញ្ជាការដ្ឋានតំបន់ ប្រតិបត្តិការសឹករងស្ទឹងត្រែង មេបញ្ជាការនៃបញ្ជាការដ្ឋានកងរាជអាវុធហត្ថខេត្ត អភិបាលនៃគណៈអភិបាល ក្រុងស្ទឹងត្រែង ប្រធានមន្ទីរសុខាភិបាលនៃរដ្ឋបាលខេត្ត ប្រធានមន្ទីរ-អង្គភាពក្នុងខេត្ត និងអ្នកពាក់ព័ន្ធ ត្រូវ ទទួលបន្ទុកអនុវត្តសេចក្តីសម្រេចនេះឲ្យមានប្រសិទ្ធភាព ចាប់ពីថ្ងៃចុះហត្ថលេខាតទៅ៕

ដោយ, សុខ ខេមរា