ភ្នំពេញ៖ ពិព័រណ៌ភាពយន្ដអន្តរជាតិ នៅទីក្រុងហុង ដែលមានការចូលរួមចំនួន៣៤ប្រទេស ក្នុងរយៈពេល៣ថ្ងៃ បានបញ្ចប់ដោយជោគជ័យ ។ គណៈប្រតិភូដែលតំណាងប្រទេសកម្ពុជា បានអញ្ញើញមកដល់ទីក្រុងភ្នំពេញ កាលពីល្ងាចថ្ងៃទី១៧ ខែមីនា ឆ្នាំ២០១៦ ដោយបានទៅចូលរួមកម្មវិធីខាងលើ បានបង្ហាញពីផ្លៃផ្កានៃការចូលរួមគួរជាទីមោទនៈ ព្រោះមានភ្ញៀវអន្តរជាតិជាច្រើនចាប់អារម្មណ៍នឹងវិស័យភាពយន្តនៅកម្ពុជា ក៏ដូចជាសសក្តានុពលថតភាពយន្តនៅកម្ពុជាផងដែរ ។
អ្នកស្រីថុង ស៊ីវទៀង នាយិកាផលិតកម្មចក្រវាឡពេជ្រ បានលើកឡើងថា បើទោះជាការចូលរួមពិព័រណ៌នោះ មិនទាន់ទទួលបានលទ្ធផលជាផ្លែផ្កាធំដុំក៏ដោយ ប៉ុន្ដែអ្នកដែលបានចូលរួមទាំងអស់ ពិសេសអ្នកស្រីតែម្តង ទទួលបានបទពិសោធន៍ច្រើន ទាំងការរៀបចំខ្លួនលើឆាកអន្ដរជាតិ ព្រមទាំងបានដឹងអំពីបច្ចេកទេសមួយចំនួន នៃការផលិតភាពយន្ដរបស់ប្រទេសជឿនលឿនមួយចំនួនផងដែរ ដែលអាចអោយអ្នកស្រីដកស្រង់បទពិសោធន៍ទាំងនោះមកធ្វើសម្រាប់ផលិតកម្មអ្នកស្រី ដើម្បីអោយភាពយន្ដខ្មែរកាន់តែល្អប្រសើរ អាចឈានទៅប្រកួតប្រជែងជាមួយប្រទេសជិតខាងបាន ។
អ្នកស្រីបន្ថែមថា អ្វីដែលធ្វើអោយអ្នកស្រីរំភើបចិត្ដ គឺកម្ពុជាមានភាពទាក់ទាញពីជាតិសាសន៍ដទៃ រហូតបានធ្វើអោយពួកគេងាកការចាប់អារម្មណ៍មកលើកម្ពុជា មិនតែប៉ុណ្ណោះក៏មានប្រទេសមួយចំនួន មានបំណងចង់មកសហការផលិតភាពយន្ដជាមួយប្រទេសកម្ពុជាផងដែរ ។
អគ្គនាយកក្រុមហ៊ុន Sabay លោកជី សិលា ដែលបានលើកឡើងថា លោកបានចូលរួមក្នុងកម្មវិធីនេះជាច្រើនដងទៅហើយ ប៉ុន្ដែលើកនេះលោកមានបំណងចង់អោយផលិតករខ្មែរចូលរួមអោយបានកាន់តែច្រើន ដើម្បីបានឃើញទីផ្សារភាពយន្ដអន្ដរជាតិអោយដឹងថា ឧស្សាហកម្មភាពយន្ដមានទំហំប៉ុណ្ណា ។ លោកបន្ថែមថា យ៉ាងហោចណាស់ការចូលរួមរបស់យើង ក៏អាចបង្ហាញដល់ផលិតករបរទេសដទៃអោយឃើញពីទីតាំងនៃការផលិតភាពយន្ដល្អនៅក្នុងប្រទេសកម្ពុជាអោយបានឃើញ និងចង់មកផលិតដែរ ។
លោកបន្ថែមថា ឆ្លងកាត់ការចូលរួមកម្មវិធីបែបហ្នឹងសង្ឃឹមថា ភាពយន្ដខ្មែរនឹងមានឱកាសឈានទៅមុខបន្ដទៀត ព្រោះភាពយន្ដខ្មែរក៏ទទួលបានការចាប់អារម្មណ៍ពីអ្នកទិញភាពយន្ដដទៃផងដែរ ។ ដោយសារតែភាពយន្ដខ្មែរកន្លង មានឱកាសបានបង្ហាញលើឆាកអន្ដរជាតិទេជាមោទនភាពដែរ ព្រោះនេះ ជាលើកទី១ សម្រាប់ភាពយន្ដខ្មែរ ដែលមានកន្លែងដាក់តាំងបង្ហាញភាពយន្ដផ្ទាល់ខ្លួននៅក្នុងកម្មវិធីពិព័រណ៌នេះ ។
គួរបញ្ជាក់ដែរថា តំណាងប្រទេសកម្ពុជាមានការចូលរួមពីខាងសមាគមន៍ភាពយន្ដមន្ដ្រីជាន់ខ្ពស់នាយកដ្ឋានភាពយន្ដលោកស៊ិន ចាន់សាយា, ផលិតកម្មចក្រវាឡពេជ្រ អ្នកស្រីថុង ស៊ីវទៀង ផលិតករ និងតំណាងពីក្រុមហ៊ុនសប្បាយលោកជី សិលា ។ ក្នុងដំណើរមកដល់ប្រទេសកម្ពុជាវិញ ក៏មានការចូលរួមស្វាគមន៍ពីសំណាក់សមាជិក នៃសមាគមន៍សិល្បករខ្មែរជាច្រើនរូបផងដែរ ៕
ដោយ៖ វឌ្ឍនា
