ខេត្តប៉ៃលិន៖ ប្រជាពលរដ្ឋ ដែលរស់នៅក្នុងក្រុងប៉ៃលិនបានសម្តែងនូវការសោកស្តាយយ៉ាងខ្លាំងចំពោះ ព្រៃឈើជាធនធានធម្មជាតិដ៏សំខាន់បំផុតសម្រាប់ទាក់ទាញទឹកភ្លៀង និងផ្តល់លំនឹងអាកាសធាតុជួយបម្រើផលប្រយោជន៍ដល់ជីវិតមនុស្ស សត្វគ្រប់ប្រភេទ ត្រូវបានអ្នកភូមិ និងមន្ត្រីកិច្ចសន្យា ខិលខូចមួយចំនួនបាននាំគ្នាកាប់បំផ្លាញដើម្បីរានយកដីដាំពោត និងដំឡូងមីយ៉ាងអនាធិបតេយ្យ ដោយមិនគិតខ្វល់ខ្វាយអំពីផលប៉ះពាល់ ចំពោះបញ្ហាគ្រោះរាំងស្ងួតហួតហែងនោះឡើយ។
តំបន់ខាងលើនេះ នៅត្រង់ចំណុចភូមិអូរប្រើស ភូមិអូរខ្ទីង ភូមិក្រចាប់ និងចំណុចអូរធ្លាក់ស ក្នុងភូមិភ្នំដំបង សង្កាត់អូរតាវ៉ៅ ក្រុងប៉ៃលិន ។
ប្រភពពីប្រជាបលរដ្ឋបានឱ្យដឹងថា រាល់ថ្ងៃពួកគាត់តែងឃើញមានសកម្មភាពកាប់បំផ្លាញព្រៃឈើ ពីសំណាក់ជនខិលខូច ដែលគិតតែពីប្រយោជន៍ផ្ទាល់ខ្លួន។ ដីខាងលើ គឺជាដីរបស់រដ្ឋសោះ តែពេលនេះត្រូវជនទាំងនោះ កាប់រំលោភយកធ្វើជាកម្មសិទ្ធិផ្ទាល់ខ្លួន ហើយដាំដុះធ្វើមិនដឹង ហាក់ដូចជា មិនខ្លាចញញើតនឹងច្បាប់ឡើយ។
បើតាមប្រភពព័ត៌មានពីមន្ត្រីបរិស្ថានខេត្ត បានបង្ហើបឱ្យដឹងថា នៅរដូវប្រាំងឆ្នាំ២០១៦នេះ ព្រៃឈើនៅតំបន់អភិរក្សជាច្រើនកន្លែង ក្នុងខេត្តប៉ៃលិន ត្រូវបានប្រជាពលរដ្ឋរស់នៅក្នុងភូមិខាងលើ និងមន្ត្រីបុគ្គលិកបណ្តែតមួយចំនួននាំគ្នាលួចកាប់ដុតស្ទើររាល់ថ្ងៃ ហើយមន្ត្រីការពារព្រៃឈើ និងសត្វព្រៃទៅដល់ ពួកគេនាំគ្នារត់គេខ្លួនអស់រលីង ដោយជួនកាលរត់ចោលម៉ាស៊ីនកាត់ឈើថែមទៀតផង។
ប្រភពបន្តទៀតថា ពេលខ្លះចាប់បានអ្នកដែលកាប់នោះហើយ គ្រាន់តែធ្វើកិច្ចសន្យារាងចាលរួចដោះលែងទៅផ្ទះវិញ។ លុះថ្ងៃក្រោយមកកាប់វិញដដែល ហើយពេលខ្លះទៀត បន្ទាប់ពីចាប់បានត្រូវគេអន្តរគមន៍ដោះលែងភ្លាមៗតែម្តង ។ សូម្បីតែនៅក្បែរស្នាក់ការអូរធ្លាក់ស ដែលធ្វើទុកឱ្យមន្ត្រីបរិស្ថានចាំយាមការពារក៏កាប់ដុតវាលស្រឡះល្វឹងល្វើយដាច់កន្ទុយភ្នែកដែរ។
ពាក់ព័ន្ធទៅនឹងបញ្ហានេះ លោក ថន គឹមហុង នាយកតំបន់ប្រើប្រាស់ច្រើនយ៉ាងសំឡូតប៉ៃលិន បានឱ្យដឹងតាម ថា ព្រៃឈើត្រង់ចំណុចខាងលើ ដែលប្រជាពលរដ្ឋនាំគ្នាកាប់ទន្ទ្រានយកដីដាំដំណាំ ដោយសារតែអាជ្ញាធរខេត្តបាត់ដំបង និងខេត្តប៉ៃលិន ឯកភាពគ្នាខ្វៀលជូនពួកគាត់កាន់កាប់ប្រើប្រាស់តាំងពីយូរឆ្នាំមកហើយ។ លោកបានបន្តទៀតថា ខាងលោកក៏បានដាក់កម្លាំងនៅទីនោះជាច្រើននាក់ដែរ ដើម្បីចាប់ពួកអ្នកដែលលួចកាប់បំផ្លាញព្រៃឈើ។ លុះក្រោយមកគេយកលិខិតដែលអភិបាលខេត្ត អនុញ្ញាតិបង្ហាញជូនព្រះរាជអាជ្ញា ក៏ត្រូវបានដោះលែងវិញ។
បើតាម លោក គឹម សុខា ប្រធានមន្ទីរបរិស្ថានខេត្ត បានឱ្យដឹងដែរថា ព្រៃតំបន់អភិរក្សខាងលើ មិនអនុញ្ញាតឱ្យប្រជាពលរដ្ឋណាម្នាក់ចូលទៅកាប់ទន្ទ្រានយកធ្វើកម្មសិទ្ធិបានទេ ហើយចំពោះការដែលថា អភិបាលខេត្តឯកភាពឱ្យកាប់ទន្ទ្រានយកដីនោះ បង្កបង្កើនផល មិនទាន់មានសេចក្តីសម្រេចណាមួយនោះទេ គ្រាន់តែបែងចែកតំបន់ព្រំប្រទល់រវាងខេត្តទាំងពីរឱ្យដឹងច្បាស់លាស់ ប៉ុណ្ណោះ។ លោកបន្តទៀតថា ខាងលោកមានឈ្មោះអ្នកលួចកាប់ព្រៃឈើទាំងនោះអស់ហើយ ដោយកំពុងរៀបចំសំណុំរឿង។
ចំណែក លោក កើត សុធា អភិបាលខេត្តប៉ៃលិន មិនអាចសុំការបំភ្លឺបានឡើយពាក់ព័ន្ធនឹងការកាប់បំផ្លាញព្រៃតំបន់ អភិរក្សខាងលើ ខណៈភ្នាក់ងារសារព័ត៌មានទាក់ទងសួរនាំខាងលោកបានប្រាប់ថា កំពុងជាប់រវល់ប្រជុំ៕
ដោយ៖ សហការី
