ខេត្តព្រះសីហនុ៖ មានករណីគ្រោះថ្នាក់ចរាចរណ៍​មួយ​បានកើតឡើងកាលពីវេលាម៉ោង៨និង១៥នាទីព្រឹក ថ្ងៃទី១៩ ខែមីនា ឆ្នាំ២០១៦ ស្ថិតនៅ​លើកំណាត់ផ្លូវជាតិលេខ៤ ក្នុងចន្លោះគីឡូម៉ែត្រលេខ២០៦-២០៧ ស្ថិតក្នុងភូមិស្មាច់ដែង ឃុំរៀម ស្រុកព្រៃនប់ ខេត្តព្រះសីហនុ បង្កឡើងដោយរថយន្ត និងរថយន្ត បណ្តាលឲ្យអ្នកបើកបរម្នាក់រងរបួសធ្ងន់ ។

សមត្ថកិច្ចបានឲ្យដឹងថា មុនពេលកើតហេតុ គេបានឃើញរថយន្តម៉ាកនីសាន់ក្បាលពណ៌ខៀវ ពាក់ស្លាកលេខ ព្រះសីហនុ 3A-1878 សណ្តោងកុងតឺន័រ ធ្វើដំណើរក្នុងទិសដៅចេញពីខេត្តព្រះសីហនុ ឆ្ពោះមកកាន់រាជធានីភ្នំពេញ ដែលជារថយន្តរបស់ក្រុមហ៊ុន អ៊ុយញ៉ុង ។ មកដល់ចំណុចកើតហេតុ ក៏បានបុកជាមួយរថយន្តមួយគ្រឿងម៉ាក ហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 3A-2724 សណ្តោងកុងតឺន័រ បើកបរ​ក្នុងទិសដៅបញ្ច្រាស់គ្នា បណ្តាលឲ្យបុក​ និងបង្កឲ្យមានការខូចខាតរថយន្តយ៉ាងដំណំ ក្នុងនោះ អ្នកបើកបរម្នាក់ឈ្មោះ អ៊ុង សំអូន ភេទប្រុស អាយុ២៤ឆ្នាំ មានទីលំនៅខេត្តព្រៃវែង បានរងរបួសធ្ងន់ ។ ដោយឡែក ភាគីរថយន្តបង្ក ក៏បាន​បើកទ្វាររត់គេចខ្លួនបាត់ស្រមោល ។

បច្ចុប្បន្ន សមត្ថកិច្ចកំពុងវាស់វែងសម្រួលចរាចរណ៍ ដែលមានការកកស្ទះ ដោយសារតែ ផ្លូវធ្វើចរាចរណ៍​មានតែមួយប៉ុណ្ណោះ ៕

ដោយ៖ សុខ ខេមរា