ខេត្តកំពង់ឆ្នាំង៖ រដ្ឋបាលខេត្តកំពង់ឆ្នាំង នៅថ្ងៃទី៨ ខែកក្កដា ឆ្នាំ២០២១នេះ សម្រេចបិទខ្ទប់ផ្សារឆ្នាំង និងលំនៅដែលជាប់ពាក់ព័ន្ធ ជាមួយផ្សារជាបណ្តោះអាសន្ន ក្រោយពីរកឃើញ អ្នកវិជ្ជមានកូវីដ-១៩ថ្មីចំនួន ២៣នាក់បន្ថែមទៀត នៅភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង រហូតដល់មានការសម្រេចជាថ្មីរបស់រដ្ឋបាលខេត្ត។
នៅក្នុងសេចក្ដីសម្រេចរបស់រដ្ឋបាលខេត្ត បានបញ្ជាក់ថា បន្ទាប់ពីបានរកឃើញមានអ្នកវិជ្ជមានកូវីដ-១៩ និងតម្រូវឱ្យអាជីវករផ្សារឆ្នាំង និងប្រជាពលរដ្ឋ ដែលមានលំនៅដ្ឋាន ជាប់ពាក់ព័ន្ធជាមួយនឹងផ្សារឆ្នាំងទាំងអស់ ត្រូវធ្វើចត្តាឡីស័ក នៅតាមលំនៅដ្ឋាន និងទីសំណាក់រៀងៗខ្លួន ឱ្យបានម៉ត់ចត់តាមការណែនាំ របស់ក្រសួងសុខាភិបាល ។
គួរជម្រាបថា ក្នុងអំឡុងពេលបិទខ្ទប់ជាបណ្ដោះអាសន្ននេះ រដ្ឋបាលខេត្ត មានវិធានការ ដូចខាងក្រោម៖
ទី១.ហ៊ុមព័ទ្ធតាំងទាំងមូល ជាបណ្ដោះអាសន្ន ។
ទី២.ផ្អាកសកម្មភាពលក់ និងការចេញចូល ទីតាំងខាងលើ ជាបណ្ដោះអាសន្ន។
និងទី៣.ធ្វើការស្រាវជ្រាវ រកអ្នកពាក់ព័ន្ធដោយផ្ទាល់ ឬដោយប្រយោល ដើម្បីធ្វើចត្តាឡីស័ក និងយកសំណាក ។
ជាមួយគ្នានេះ រដ្ឋបាលខេត្ត សូមអំពាវនាវចំពោះបងប្អូនប្រជាពលរដ្ឋ ដែលធ្លាប់ជាប់ពាក់ព័ន្ធដោយប្រយោល ឬអ្នកពាក់ព័ន្ធដោយផ្ទាល់ ក្នុងទីតាំងខាងលើ ត្រូវតាមដានសុខភាពរបស់ខ្លួនជាប្រចាំ និងសូមទំនាក់ទំនង មកក្រុមការងារ មន្ទីរពេទ្យបង្អែកខេត្តកំពង់ឆ្នាំង ឬមណ្ឌលសុខភាព ដែលនៅជិតបំផុត ដើម្បីយកសំណាក ធ្វើតេស្តជាបន្ទាន់ ចាប់ពីថ្ងៃទី៨ កក្កដា ២០២១ រៀងរាល់ម៉ោងធ្វើការ និងត្រូវធ្វើចត្តាឡីស័ក ស្របតាមការណែនាំរបស់ក្រសួងសុខាភិបាលកម្ពុជា៕ដោយ៖សហការី
