ខេត្តមណ្ឌលគិរី៖ បេីតាមការបញ្ជាក់ពីលោក ហៀក សុផាន អភិបាលក្រុងសែនមនោរម្យ នៅព្រឹកថ្ងៃទី៨ ខែកក្កដា ឆ្នាំ២០២១នេះ បានថ្លែងថា៖ ក្រោយមានការបិទខ្ទប់ដោយសារតែរកឃើញមានអ្នកវិជ្ជមានជំងឺកូវីដ-១៩ ជាបន្តបន្ទាប់នៅផ្សារសែនមនោរម្យ ពេលនេះអាជ្ញាធរក្រុងសែនមនោរម្យ បានបន្តចុះយកសំណាកលើអាជីវករលក់ដូរទាំងអស់។
អភិបាលក្រុងសែនមនោរម្យ បានថ្លែងបន្តថា រដ្ឋបាលក្រុង បានដឹកនាំកងកម្លាំងអធិការរដ្ឋាននគរបាលក្រុង កងកម្លាំងរាជអាវុធហត្ថក្រុង និងក្រុមការងាររដ្ឋបាលសង្កាត់ ចូលរួមសហការជាមួយក្រុមគ្រូពេទ្យនៃមន្ទីរសុខាភិបាលខេត្តចុះបិទខ្ទប់ធ្វើយុទ្ធនាការយកសំណាកបងប្អូនអាជីវករនៅផ្សារបណ្តោះអាសន្នលើសួរច្បារដំរីដែក និងផ្សារគុម្ពឬស្សី លើមនុស្សសរុបចំនួន ១១០នាក់ ក្នុងនោះស្រីចំនួន៨២នាក់ ដើម្បីធ្វើតេស្តរហ័សរកមេរោគកូវីដ-១៩ គឺអវិជ្ជមានទាំងអស់ ។
ដោយឡែកបើតាមសេចក្តីរាយការណ៍របស់អាជ្ញាធរមូលដ្ឋាន បានបញ្ជាក់នៅថ្ងៃទី៨ ខែកក្កដានេះ អ្នកជំងឺកូវីដ-១៩ ដែលសម្រាកព្យាបាលនៅមន្ទីពេទ្យបង្អែក និងមណ្ឌលធ្វើចត្តាឡីស័កវិទ្យាល័យ ហ៊ុន សែន មណ្ឌលគិរី បានជាសះស្បើយសរុប១៣នាក់ ស្រី៨នាក់ វិលត្រឡប់ទៅផ្ទះវិញ។ ប៉ុន្ដែក្រុមគ្រូពេទ្យ និងលោកអភិបាលក្រុង បានធ្វើការណែនាំដល់អ្នកជាសះស្បើយទាំងអស់ត្រូវយកចិត្តទុកដាក់ខិតខំប្រឹងប្រែងថែរក្សាសុខភាពក្នុងក្រុមគ្រួសាររបស់ខ្លួន និងត្រូវបន្តធ្វើចត្តាឡីស័ក ដោយខ្លួនឯង រយៈពេល១៤ថ្ងៃបន្ថែមទៀត ដើម្បីចូលរួមបង្ការ ការពារទប់ស្កាត់នៃការរីករាលដាលជំងឺកូវីដ-១៩ ក្នុងសហគមន៍ ។
គួរបញ្ជាក់ថា ខេត្តមណ្ឌលគិរី មានចំនួនអ្នកជំងឺកូវីដ-១៩ សរុបចំនួន២០៧នាក់ ក្នុងនោះស្លាប់ពីរនាក់ គិតត្រឹមរសៀលថ្ងៃទី០៨ ខែកក្កដា ឆ្នាំ២០២១នេះ៕ដោយ៖សហការី
