អន្តរជាតិ​៖ បើតាមទីភ្នាក់ងារសារព័ត៌មានឡាវ Times​ បានដកស្រង់ចេញផ្សាយពី​អាជ្ញាធរសុខាភិបាលឡាវ បានចេញសេចក្តីប្រកាសនៅព្រឹកថ្ងៃព្រហស្បតិ៍ ទី១៥ ខែកក្កដា ឆ្នាំ២០២១នេះថា៖​ ត្រឹម​រយៈពេល​មួយ​ថ្ងៃ​ប៉ុណ្ណោះ​ មនុស្សសរុបរហូតដល់ទៅ ១,៤៥១នាក់ ត្រូវបានធ្វើតេស្តរក COVID-19 ក្នុងនោះ​រកឃើញ​មនុស្ស​​ ១១៦នាក់មានវិជ្ជមាន។

អាជ្ញាធរសុខាភិបាលឡាវ​ បានបន្ថែមទៀតថា​ ការរកឃើញករណីឆ្លងថ្មីៗយ៉ាងច្រើននេះ បាននាំឲ្យករណីឆ្លងសរុប នៅក្នុងប្រទេសឡាវមួយនេះ​ បានកើនឡើងដល់ ៣,០៩២ករណី ខណៈអ្នកជំងឺម្នាក់ទៀតបានស្លាប់ ធ្វើឲ្យចំនួនអ្នកស្លាប់សរុបដោយសារ COVID-19 កើនឡើងដល់ ០៤នាក់។ នៅក្នុងចំណោមករណីឆ្លងថ្មីៗទាំងនោះ គឺមានតែពីរករណីប៉ុណ្ណោះ ដែលជាប្រភេទករណីឆ្លងសហគមន៍ ក្នុងនោះមួយករណីត្រូវរកឃើញនៅទីក្រុងវៀងច័ន្ទ និងមួយករណីទៀតនៅខេត្តឧត្តមសៃ (Oudomxay)។

គួរបញ្ជាក់ថា​ សម្រាប់ករណីនាំចូលវិញ គឺខេត្តសាវណ្ណា​ (Savannakhet) បានរកឃើញរហូតដល់ ៦៧ករណី និងខេត្ត ចម្ប៉ាសាក់ ៤១ករណី នៅក្នុងកំឡុងពេល មួយថ្ងៃ​ដូចគ្នា។ នេះជារកឃើញករណីឆ្លងយ៉ាងច្រើនបំផុតមួយ ក្រោយពីប៉ុន្មានសប្តាហ៍ដែលប្រទេសឡាវ បានជួបភាពស្ងប់ស្ងាត់វិញ បន្ទាប់ពីការផ្ទុះករណីឆ្លង COVID-19 ធ្ងន់ធ្ងរលើកដំបូង កាលពីអំឡុងខែមេសា ឆ្នាំ២០២១៕ដោយ​៖ស​ តារា​

រូបថត​៖Xinhua