លោកស្រី Martine Moise ភរិយាប្រធានាធិបតីប្រទេសហៃទីដែលត្រូវគេធ្វើឃាតបានវិលត្រឡប់ទៅប្រទេស វិញហើយនៅថ្ងៃទី ១៧ខែកក្កដា ក្រោយបញ្ជូនមកព្យាបាលនៅមន្ទីរពេទ្យអាមេរិក ដោយរងរបួសធ្ងន់នៅក្នុងការវាយប្រហារធ្វើឃាតស្វាមីរបស់លោកស្រីកាលពីដើមខែនេះ។

សារព័ត៌មាន AP របស់អាមេរិក បានផ្សាយថា លោកស្រី Martine Moise ពាក់អាវការពារគ្រាប់ ហើយដៃមានរុំរបួសបង្ហាញវត្តមាននៅក្នុងអាកាសយានដ្ឋានអន្តរជាតិ Toussaint Louvertureក្នុងរដ្ឋធានី Port-au-Prince នាថ្ងៃទី១៧ខែកក្កដា។ នាយករដ្ឋមន្ត្រីបណ្តោះអាសន្ន លោក Claude Joseph និងមន្ត្រីជាច្រើនរូបទៀតបានទៅទទួលលោកស្រី។ ក្បួនរថយន្តការពារលោកស្រីយ៉ាងតឹងតែងក្រោយស្វាមីរបស់លោកស្រីគឺប្រធានាធិបតី Jovenel Moiseរងការធ្វើឃាតនៅក្នុងផ្ទះនាថ្ងៃទី ៧ខែកក្កដា ។
ការវិលត្រឡប់ទៅប្រទេសវិញរបស់លោកស្រី Martine Moise ធ្វើឲ្យមនុស្សជាច្រើនភ្ញាក់ផ្ងើលយ៉ាងខ្លាំង ក្នុងពេលប្រទេសដែលមានពលរដ្ឋជាង១១លាននាក់ប្រឈមនិងបញ្ហាជាច្រើនក្រោយប្រធានាធិបតីរងការធ្វើឃាត។ បាតុកម្មកើតឡើងជាបន្តបន្ទាប់ នៅក្នុងប្រទេសនេះ អំពើហិង្សា ការឆក់បន្លន់បានកើតឡើង ក្រោយប្រធានាធិបតីរងការធ្វើឃាត។
រដ្ឋាភិបាលហៃទីបានប្រកាសនៅថ្ងៃទី ១៦ខែកក្កដាថា ពិធីបុណ្យសពរបស់អតីតប្រធានាធិបតី Martine Moise នឹងត្រូវធ្វើឡើងនៅថ្ងៃទី ២៣ខែកក្កដាខាងមុខ៕ដោយ៖ធីរីណា

រូបថត៖AP