ភ្នំពេញ៖ ករណីរថយន្តដឹកដីបុក ចូលផ្ទះជុសជុលម៉ូតូនៅក្បែរផ្សារ ថ្នល់បត់ ផ្លូវបេតុង217 ស្ថិតភូមិ ថ្មី សង្កាត់ដង្កោ ខណ្ឌដង្កោ កាល ពីវេលាម៉ោង11ព្រឹកថ្ងៃទី21 ខែមីនា ឆ្នាំ2016 រវាងម្ចាស់ផ្ទះនិងភាគីរថយន្តបង្កនៅភាពប្រទាំងប្រទិសគ្នាត្រង់ថា ភាគីម្ចាស់ ផ្ទះបានទារសំណង1500ដុល្លារ ។ នេះបើតាមឲ្យដឹងពីសមត្ថកិច្ចចរាចរណ៍កាលពីព្រឹកថ្ងៃទី22 មីនា។
ដោយឡែកប្រភពពីមន្ត្រីសាលា សង្កាត់ដង្កោក៏បានឲ្យដឹងដែរថា តាមពិតទៅផ្ទះរងគ្រោះនេះគ្មាន ប្លង់នោះទេ ហើយផ្ទះនេះសង់នៅលើចិញ្ចើមផ្លូវ ហើយអាជ្ញាធរ សង្កាត់យើងបានឲ្យរុះរើផងដែរ ។
ជាមួយគ្នានេះផងដែរ លោក វើក សាមឿន ចៅសង្កាត់ដង្កោក៏បាន ពន្យល់បន្ថែមថា ផ្ទះនេះអាជ្ញាធរ យើងបានអនុញ្ញាតឲ្យគាត់រស់នៅជាបណ្តោះអាសន្នទេ ហើយនៅពេលណាដែលគេពង្រីកផ្លូវដាច់ខាតត្រូវតែរុះរើ។ លោកចៅសង្កាត់បន្ថែមថា ការដែលទារសំណងនេះច្រើនហួសហេតុពេក ហើយភាគី រថយន្តក៏ជាអ្នកខុសផងដែរ ហេតុដូច្នេះត្រូវចរចារគ្នាសំណង សមរម្យ ។
ដោយឡែកលោក នាក់ ណារ៉ូ អធិការរងនគរបាលខណ្ឌដង្កោទទួលបន្ទុកសណ្តាប់ធ្នាប់ចរាចរក៏បានបញ្ជាក់បន្ថែមថា ម្ចាស់ទារ សំណងហួសហេតុពេក ហេតុដូច្នេះលោកទុកឲ្យភាគីទាំង2ជួបដោះស្រាយគ្នា។ លោកថា ការខូចខាតដូចជាមិន ច្រើនទេគ្រាន់តែកំពិតកំប៉ុងប្រេង ម៉ាស៊ីននិងសំភារៈផ្សេងៗ ហើយ ក្មេងស្រីរងគ្រោះ2នាក់ ដែលជាកូនម្ចាស់ផ្ទះនោះក៏មិនរបួសបាក់ ដៃបាក់ជើងទេ គ្រាន់តែខ្ទាតដុំថ្ម ត្រូវដៃជើងបន្តិចបន្តួចបណ្ណោះ។ លោកថា បច្ចុប្បន្នរថយន្តបង្កហេតុកំពុងរក្សាទុកនៅអធិការដ្ឋាននគរបាលខណ្ឌដង្កោ រង់ចាំដោះស្រាយគ្នា ៕
ដោយ៖ តាឡឹម
