ខេត្តកណ្តាល៖ បុរសម្នាក់ត្រូវកម្លាំងនគរបាលប៉ុស្តិ៍គគីរចាប់ខ្លួន បន្ទាប់ពីស្ត្រីជាប្រពន្ធប្តឹង ពាក់ព័ន្ធករណីផឹកស្រាស្រវឹងហើយប្រើអំពើហិង្សានៅក្នុងគ្រួសារដេញវាយប្រពន្ធ-កូន ខ្មាស់គេពេញភូមិដោយទ្រាំលែងបានប្តឹងសមត្ថកិច្ចឲ្យចាប់ខ្លួនតែម្តង។

ករណីចាប់ខ្លួនជនសង្ស័យ ប្រើអំពើហិង្សាក្នុងគ្រួសារនេះបានធ្វើឡើងនៅល្ងាចថ្ងៃទី២១ ខែមីនា ឆ្នាំ២០១៦ ក្នុងភូមិចិនកោះ  ឃុំគគីរ ស្រុកកៀនស្វាយ ខេត្តកណ្តាល។

ជនរងគ្រោះជាប្រពន្ធមានឈ្មោះយស់ យ៉ាត អាយុ២៤ឆ្នាំ មុខរបរកម្មកររោងចក្រ រស់នៅភូមិឃំុកើតហេតុ ចំណែកជនសង្ស័យត្រូវជាប្តីមានឈ្មោះអ៊ូច សៅ អាយុ៤២ឆ្នាំ មុខរបរសន្តិសុខរស់នៅភូមិឃំុជាមួយគ្នា។

លោក វ៉េង កុសល នាយប៉ុស្តិ៍នគរបាលគគីរបានឲ្យដឹងថា នៅពេលវេលាម៉ោងខាងលើជនសង្ស័យបានមកផឹកស្រាស្រវឹងមកដល់ផ្ទះវិញរករឿងប្រពន្ធកូនបានដេញវាយប្រពន្ធ និងបានបំផ្លិចបំផ្លាលទ្រព្យសម្បត្តិបណ្តាលខូចខាត និងបានដេញប្រពន្ធឲ្យចេញពីផ្ទះនិងក៏ធ្លាប់ប្រើអំពើហិង្សាជាញឹកញ៉ាប់មកប្រពន្ធកូននិងឪពុកក្មេក។

បន្ទាប់ពីបង្កហេតុជនរងគ្រោះបានដាក់ពាក្យបណ្តឹងទើបសមត្ថកិច្ចប៉ុស្តិ៍ចុះទៅធ្វើការឃាត់ខ្លួនហើយបានបញ្ចូនទៅអធិការស្រុកដើម្បីចាត់ការតាមនីតិវិធីច្បាប់៕

ដោយ៖ សណ្តោស