ខេត្តព្រះសីហនុ៖ នគរបាលក្រុងព្រះសីហនុបានចាប់ខ្លួនបុរសម្នាក់ពាក់ព័ន្ធលួចម៉ូតូរបស់គេ កាលពីយប់ថ្ងៃទី២២ ខែមីនា ឆ្នាំ២០១៦ ហើយត្រូវបានចាប់ខ្លួននៅវេលាទៀបភ្លឺថ្ងៃទី២៣ ខែមីនា ឆ្នាំ២០១៦ នៅចំណុចក្រុម៣៥ ភូមិ១ សង្កាត់លេខ៤ ក្រុង-ខេត្តព្រះសីហនុ។

មន្ត្រីនគរបាលក្រុងព្រះសីហនុបានឲ្យដឹងថា ជនសង្ស័យដែលត្រូវបានសមត្ថកិច្ចចាប់ខ្លួនឈ្មោះ សំ សុខា អាយុ៣០ឆ្នាំ មុខរបរអ្នកនេសាទ មានទីលំនៅភូមិគគី ឃុំបិតត្រាំង ស្រុងព្រៃណុប ខេត្តព្រះសីហនុ។

មន្ត្រីដដែលបានបញ្ជាក់ថា ម៉ូតូដែលជនសង្ស័យលួចយកមិនបានសម្រេចនេះម៉ាកឌ្រីម គ្មានស្លាកលេខ។ ម៉ូតូនេះជាកម្មសិទ្ធរបស់ឈ្មោះលឹម ស៊ាន់ ភេទប្រុស អាយុ២៨ឆ្នាំ ស្នាក់នៅភូមិ៥ សង្កាត់លេខ៤ ក្រុង-ខេត្តព្រះសីហនុ។

បើតាមម្ចាស់ម៉ូតូបានឲ្យដឹងថា នៅមុខពេលបាត់ម៉ូតូគាត់បានទុកម៉ូតូនៅមុខផ្ទះ តែភ្លេចចាក់សោកម៉ូតូហើយក៏ចូលទៅដេក។ លុះមកដល់ម៉ោងជាង២ពេលដែលភ្ញាក់ដឹកខ្លួនស្រាប់តែបាត់ម៉ូតូក៏បានរាយការណ៍ទៅនគរបាលក្រុងព្រះសីហនុ ហើយខណៈដែលសមត្ថកិច្ចនគរបាលក្រុងព្រះសីហនុចុះល្បាតក៏ប្រទះឃើញជនសង្ស័យឃាត់ខ្លួនតែម្តងទៅ។

បច្ចុប្បន្នជនសង្ស័យលួចម៉ូតូខាងលើនេះត្រូវបានសមត្ថកិច្ចកសាងសំណុំរឿងបញ្ជូនទៅតុលាការដើម្បីចាត់ការតាមច្បាប់៕

ដោយ៖ ឆ្លាមសមុទ្រ