ភ្នំពេញ៖ ជនសង្ស័យម្នាក់បានធ្វេីសកម្មភាពលួចម៉ូតូម៉ាកnex2 មួយគ្រឿងរបស់មិត្តភក្តិហេីយបានយកទៅលក់នៅហាងបញ្ចាំមួយកន្លែងនៅផ្លូវ២៤៧ ក្នុងសង្កាត់ទឹកល្អកទី៣ ខណ្ឌទួលគោក រួចព្យាយាមគេចខ្លួនអស់រយៈពេលជិត១ខែទៅហេីយរហូតមកដល់យប់ថ្ងៃទី២៨ ខែកក្កដា ឆ្នាំ២០២១ ទេីបជនរងគ្រោះចាប់បាននិងនាំមករកម៉ូតូវិញប្តឹងសមត្ថកិច្ចសុំការអន្តរាគមន៍។
ជនសង្ស័យឈ្មោះហុីម រតនា ភេទប្រុសអាយុ២០ឆ្នាំ មុខរបរមិនពិតប្រាកដស្នាក់នៅមិនដុំផ្លូវរត់ភ្លើងបឹងកក់ សង្កាត់ស្រះចក ខណ្ឌដូនពេញ។
តាមប្រភពព័ត៌មានពីជនរងគ្រោះឈ្មោះ លី សារិទ្ធ បានឱ្យដឹងថា រូបគេនឹងជនសង្ស័យជាមិត្តនឹងគ្នាកាលពីយប់ថ្ងៃទី៩ខែកក្កដា ឆ្នាំ២០២១ ពួកគេបានជិះម៉ូតូnex2 មួយគ្រឿងពណ៌ស ពាក់ស្លាកលេខភ្នំពេញ1HT 9212 ដេីរលេងជាមួយគ្នា ។
ជនរងគ្រោះបន្តថា បន្ទាប់មកក៏នាំគ្នាចូលទៅដេកក្នុងផ្ទះសំណាក់មួយកន្លែងម្តុំផ្លូវភ្លោះអូរឫស្សី សង្កាត់បឹងព្រលិត ខណ្ឌ 7មករា ខណៈដែលរូបគាត់ដេកលក់បាត់ជនសង្ស័យ(មិត្តភក្ដិ)បានលួចយកម៉ូតូគេចខ្លួនបាត់។
រហូតមកដល់យប់ថ្ងៃទី២៨ ខែកក្កដា ឆ្នាំ២០២១ ជនរងគ្រោះបានប្រទះឃេីញជនសង្ស័យនៅម្តុំអូរឫស្សីទេីបធ្វេីការឃាត់ខ្លួនតែម្តង ហេីយបាននាំជនសង្ស័យទៅចង្អុលបង្ហាញទីតាំងកន្លែងដែលយកម៉ូតូទៅលក់។
បេីតាមសម្តីជនសង្ស័យបានឱ្យដឹងថា ម៉ូតូដែលខ្លួនលួចបាន យកទៅលក់នៅហាងបញ្ចាំមួយកន្លែងតាមបណ្ដោយផ្លូវ 247 ទឹកល្អកទី3 ខណ្ឌទួលគោក បានតម្លៃ 150 ដុល្លារ។
បច្ចុប្បន្នជនសង្ស័យត្រូវបានសមត្ថកិច្ចនាំខ្លួនយកទៅសាកសួរបន្តនិងកសាងសំណុំរឿងបញ្ជូនទៅអធិការដ្ឋានខណ្ឌ៧មករាដេីម្បីចាត់ការតាមច្បាប់៕
ដោយ៖ សុខាសែនជ័យ
