ភ្នំពេញ៖ កម្លាំងសមត្ថកិច្ចជំនាញ នៃអធិការដ្ឋាននគរបាលខណ្ឌដង្កោ សហការជាមួយសមត្ថកិច្ចនគរបាលខណ្ឌសែនសុខ ធ្វើការស្រាវជ្រាវឃាត់ខ្លួនជនសង្ស័យម្នាក់ កាលពីវេលាម៉ោង០៩និង៣០នាទីថ្ងៃទី៣១ ខែកក្កដា ឆ្នាំ២០២១ ត្រង់ចំណុចខាងមុខមន្ទីរពេទ្យលោកសង្ឃ ស្ថិតនៅភូមិត្រពាំឈូក សង្កាត់ទឹកថ្លា ខណ្ឌសែនសុខ បន្ទាប់ពីជាប់ពាក់ព័ន្ធករណីឆបោក (យកម៉ូតូ) កាលពីថ្ងៃទី៣០ ខែកក្កដា ឆ្នាំ២០២១ វេលាម៉ោង២០និង៣០នាទី ត្រង់ចំណុចដីឡូតិ៍គ្មានលេខ ផ្លូវលំ ស្ថិតនៅភូមិម្ភៃបួន សង្កាត់ព្រៃស ខណ្ឌដង្កោ រាជធានីភ្នំពេញសមត្ថកិច្ចបានឲ្យដឹងថា ជនរងគ្រោះឈ្មោះ មាស រិទ្ធី ភេទប្រុស អាយុ៣២ឆ្នាំ ជនជាតិខ្មែរ មុខរបរមេការចាក់ដី ទីលំនៅភូមិថ្មី ឃុំលំពង់ ស្រុកកណ្តាលស្ទឹង ខេត្តកណ្តាល ។ ចំណែកជនសង្ស័យឈ្មោះ សៀន សុភ័ក្ត្រ ហៅ ក្តី ភេទប្រុស អាយុ២៨ឆ្នាំ មុខរបរមិនពិតប្រាកដ ស្នាក់នៅផ្ទះជួល ភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ (ជនសង្ស័យមានសារធាតុញៀ)។
ដោយឡែកវត្ថុតាងចាប់យក៖ ម៉ូតូម៉ាកហុងដាសេ១២៥ ពណ៌ខ្មៅ ពាក់ផ្លាកលេខភ្នំពេញ1GU-3138 ចំនួន០១គ្រឿង ។
សមត្ថកិច្ចបានឲ្យដឹងទៀតថា កាលពីថ្ងៃទី៣០ ខែកក្កដា ឆ្នាំ២០២១ វេលាម៉ោង២០និង៣០នាទី ជនរងគ្រោះឈ្មោះ មាស រិទ្ធី ភេទប្រុស អាយុ៣២ឆ្នាំ កំពុងតែអង្គុយផឹកស៊ីជាមួយអ្នកបើករថយន្តដឹកដីដូចគ្នា ចំនួន០៧នាក់ ទី០១ឈ្មោះ ខ្លី ភេទប្រុស អាយុ២៨ឆ្នាំ ទី០២ឈ្មោះ នឿន ភេទប្រុស អាយុ២៥ឆ្នាំ ទី០៣ឈ្មោះ រុន ភេទប្រុស អាយុ២៨ឆ្នាំ ទី០៤ជនរងគ្រោះ និង០៣នាក់ទៀតមិនស្គាល់ឈ្មោះ ស្ថិតនៅភូមិម្ភៃបួន សង្កាត់ព្រៃស ខណ្ឌដង្កោ រាជធានីភ្នំពេញ ។ ពេលនោះស្រាប់តែឃើញជនសង្ស័យឈ្មោះ សៀន សុភ័ក្ត្រ ហៅ ក្តី ភេទប្រុស អាយុ២៨ឆ្នាំ ជាមួយឈ្មោះ ផន ចាន់មករា ហៅ រ៉ូ ភេទប្រុស អាយុ៣២ឆ្នាំ បានជិះកង់បីឥណ្ឌាមកដល់ ក៏ចុះដើរសំដៅមករកក្រុមជនរងគ្រោះដែលកំពុងអង្គុយផឹកស៊ី ហើយជនរងគ្រោះមិនដែលស្គាល់ជនសង្ស័យទេ តែឃើញជនសង្ស័យដើរសំដៅចូលមកស្មានតែជាអ្នកបើករថយន្តដឹកដីដែរ ក៏បានហៅឱ្យចូលផឹកស៊ីជាមួយគ្នា ។ ពេលជនសង្ស័យអង្គុយផឹកស្រាបៀរអាន់ឆ័រអស់០៣កំប៉ុង ក៏បាននិយាយសុំខ្ចីម៉ូតូម៉ាកសេ១២៥ ពណ៌ខ្មៅ សេរីឆ្នាំ២០១៨ ពាក់ផ្លាកលេខភ្នំពេញ1GU-3138 របស់ជនរងគ្រោះថា ទៅទិញស្រាបៀរយកមកផឹកស៊ីថែមទៀត ហើយជនរងគ្រោះក៏បានឱ្យម៉ូតូម៉ាកខាងលើ ទៅជនសង្ស័យ ដើម្បីទៅទិញស្រាបៀរ ។ បន្ទាប់មកជនសង្ស័យក៏បានជិះម៉ូតូរបស់ជនរងគ្រោះ ចេញទៅបាត់រហូត មិនឃើញត្រឡប់មកវិញទេ ទោះបីជនរងគ្រោះទាក់ទងតាមរយៈទូរស័ព្ទក៏មិនអាចទាក់ទងបានដែរ ។ ហើយជនរងគ្រោះក៏បានមករាយការណ៍ប្រាប់សមត្ថកិច្ច និងដាក់ពាក្យបណ្តឹងនៅប៉ុស្តិ៍នគរបាលរដ្ឋបាលព្រៃស ដើម្បីឱ្យសមត្ថកិច្ចជួយស្រាវជ្រាវរកជនសង្ស័យយកមកធ្វើការសាកសួរតាមនីតិវិធីច្បាប់ ។ លុះដល់ថ្ងៃទី៣១ ខែកក្កដា ឆ្នាំ២០២១ វេលាម៉ោង០៩និង៣០នាទី សមត្ថកិច្ចនគរបាលខណ្ឌដង្កោ បានទៅសហការជាមួយសមត្ថកិច្ចនគរបាលខណ្ឌសែនសុខ ធ្វើការស្រាវជ្រាវឃាត់ខ្លួនជនសង្ស័យបានរួមនិងវត្ថុតាង(ម៉ូតូមួយគ្រឿងរបស់ជនរងគ្រោះ) ត្រង់ចំណុចខាងមុខមន្ទីរពេទ្យលោកសង្ឃ ស្ថិតនៅភូមិត្រពាំឈូក សង្កាត់ទឹកថ្លា ខណ្ឌសែនសុខ យកមកធ្វើការសាកសួរនៅប៉ុស្តិ៍នគរបាលរដ្ឋបាលព្រៃសរ តាមនីតិវិធី ៕ ដោយ ៖ ភារ៉ា ដង្កោ
