ខេត្តឈៀងរ៉ៃ៖ ព្រឹត្តិការណ៍ប្រកួតកីឡា ដែលគេប្រសិទ្ធនាមថា Mekong good will Games លើកទី១២ ដោយមានសមាសភាពអត្តពលិក មកពីតាមបណ្តាប្រទេសនៅជាប់តាមដងទន្លេមេគង្គ បានដំណើរការចាប់ពីថ្ងៃទី១៩ ខែមីនាឆ្នាំ ២០១៦ មានប្រទេសចូលរួមចំនួន៥ដូចជា ថៃម្ចាស់ផ្ទះ កម្ពុជា ឡាវ មីយ៉ាន់ម៉ា ចិន រីឯប្រទេសវៀតណាម បានអវត្តមាន។
គិតត្រឹមល្ងាចថ្ងៃទី២៣ ខែមីនា ឆ្នាំ២០១៦ អត្តពលិកកម្ពុជាចំនួន២ប្រភេទកីឡាប៉ុណ្ណោះ ដែលរកបានមេដាយជាបណ្តោះអាសន្ន គឺកីឡាប៉េតង រកបានមេដាយ៣គ្រឿង និងកីឡាវាយកូនឃ្លីលើតុរកបានមេដាយមាស១គ្រឿង នេះបើតាមឲ្យដឹងពីលោក ប៊ូជុំសេរី អនុរដ្ឋលេខាធិការក្រសួងអប់រំយុវជននិងកីឡា និងជាប្រធានប្រតិភូកម្ពុជា។
លោកមានប្រសាសន៍ថា សម្រាប់ប្រភេទកីឡាប៉េតង ដែលដណ្តើមបានមេដាយ មាស១គ្រឿង លេងវិញ្ញាសាវាយគូចំរុះ មានកីឡាករ យ៉ា ចន្ទដាតារិទ្ធ និង ឃូន យ៉ារី ស្ថិតក្នុងក្រុម B មេដាយប្រាក់រកបានដោយ កីឡាករ ម៉ី សុភ័ក្ត្រ និងឈិន ស្រីពេជ្រ វិញ្ញាសាគូចំរុះ ស្ថិតនៅក្នុងក្រុមA និង មេដាយសំរឹទ្ធិ រកបានដោយកីឡាករ ថោងឈឿន និងធា សម្ផស្ស នៅក្នុងក្រុមC ។
លោកបានបន្តទៀតថា នាល្ងាចថ្ងៃទី២៣ខែមីនាឆ្នាំ២០១៦ ក្រុមកីឡាវាយកូនឃ្លីលើតុកម្ពុជាវិញ្ញាសាវាយគូ កីឡាករ សឺនតុលា និងសំណាង វីរ:បុត្រ កំពុងត្រៀមប្រកួតវគ្គផ្តាច់ព្រ័ត្រ ជាមួយក្រុមឡាវ នាព្រឹកថ្ងៃទី២៤ខែមីនា។ រីឯកីឡាករ សំណាង វីរ:បុត្រក៏ត្រូវប្រកួតផ្តាច់ព្រ័ត្រជាមួយកីឡាករ ឡាវ វគ្គផ្តាច់ព្រ័ត្រវិញ្ញាសា វាយទោលនាថ្ងៃទី២៤ខែមីនាផងដែរ។
ចំពោះកីឡាចំនួន៣ប្រភេទផ្សេង មានដូចជា កីឡាសីប៉ាក់តាក្រ បាល់ទាត់ និងវាយសី នៅមិនទាន់ទទួល បានមេដាយឬក៏ចំណាត់ថ្នាក់នៅឡើយ ៕ សារីម
