រដ្ឋមន្ត្រីការបរទេសរុស្ស៊ីុលោកសឺហ្គេយឡារ៉ូ កាលពីថ្ងៃទី២៣ខែមីនា បានអំពាវនាវដល់សហគមន៍អឺរ៉ុបបញ្ចប់«ល្បែងហ្គេមនយោបាយភូមិសាស្ត្រ» ដោយរួមគ្នាប្រឆាំងក្រុមភេរវកម្ម ដែលបានគម្រាមកំហែងដល់ជីវិតរស់នៅរបស់ពលរដ្ឋ។
សកម្មភាពខាងលើរបស់រុស្ស៊ីុកើតឡើងក្រោយមានការវាយប្រហារភេរវកម្ម ចំកណ្តាលបេះដូចអឺរ៉ុប គឺនៅក្នុងប្រទេសប៊ែលហ្ស៊ិក សម្លាប់មនុស្ស៣៤នាក់។ សារព័ត៌មានរុស្ស៊ីុបានដកស្រង់សម្តីលោកឡារ៉ូបញ្ជាក់នៅក្នុងជំនួបពិភាក្សាជាមួយសមភាគីអាល្លឺម៉ង់លោកFrank Walter Steinmeie ថា «ខ្ញុំសង្ឃឹមថា អឺរ៉ុប កំពុងប្រឈមនិងការគម្រាមកំហែងកាន់តែខ្លាំងពីក្រុមភេរវកម្ម ដោយបានវាយប្រហារនៅក្នុងប្រទេសបារាំងនៅប៊ែលហ្ស៊ិចនាពេលកន្លងមក ។ចំណុចទាំងនោះអឺរ៉ុបគួរតែទុកល្បែងហ្គេម នយោបាយ ដោយឡែក រួមគ្នាប្រយុទ្ធប្រឆាំងក្រុមភេរវកម្ម ដែលចាប់ផ្តើមចេញពីភូមិសាស្ត្រក្នុងប្រទេសអឺរ៉ុបផ្ទាល់។
រុស្ស៊ីុបានអំពាវនាវឲ្យសាមគ្គីគ្នាប្រឆាំងក្រុមភេរវកម្ម ក្រោយការខិតខំស្វែងរកសន្តិភាពដល់វិបត្តិនៅក្នុងប្រទេសស៊ីរី។ រដ្ឋមន្ត្រីការបរទេសអាល្លឺម៉ង់ កាលពីថ្ងៃទី២៣ខែមីនាបានទៅដល់ទីក្រុង ម៉ូស្កូ បន្ទាប់ពីរដ្ឋមន្ត្រីការរទេសអាមេរិកចនឃើរីទៅកាន់រុស្ស៊ីុផងដែរ។ រដ្ឋមន្ត្រីការបរទេសទាំងពីររូបបានរៀបចំឲ្យមានជំនួបពិភាក្សាដាច់ដោយឡែកពីគ្នាជាមួយប្រធានាធិបតីពូទីន។
នៅក្នុងជំនួបនោះត្រូវបានក្រុមអ្នកសើុបអង្កេតអះអាងថា គោលដៅសំខាន់នៅក្នុងកិច្ចពិភាក្សានោះគឺសន្តិភាពស៊ីរីក្រោយរុស្ស៊ីុដកទាហានចេញ និងការប្រយុទ្ធប្រឆាំងក្រុមភេរវកម្ម ដែលកំពុងគម្រាមកំហែងនៅគ្រប់ទិសទីជុំវិញពិភពលោក ក្នុងនោះមានទាំងរុស្ស៊ី និងអឺរ៉ុបអាមេរិក៕
ប្រែសម្រួល៖ ម៉ែវ សាធី
