ភ្នំពេញ៖ រថយន្តឡង់គ្រីស័រមួយគ្រឿង ខណៈដែលកំពុងធ្វើចរាចរណ៍នៅតាមដងផ្លូវសុខៗ ស្រាប់ត្រូវភ្លើងឆាបឆេះបណ្តាលឲ្យផ្អើលឈុលទាំងព្រឹក ។ ហេតុការណ៍នេះបានកើតឡើងកាលពីវេលាម៉ោង៨និង៤៥នាទីព្រឹក ថ្ងៃទី២០ ខែកក្កដា ឆ្នាំ២០១៥ ស្ថិតនៅផ្លូវលេខ២៩៨ សង្កាត់បឹងកក់១ ខណ្ឌទួលគោក រាជធានីភ្នំពេញ។ សាក្សីនៅកន្លែងកើតហេតុបានបញ្ជាក់ថា នៅមុនពេលកើតហេតុ គេឃើញរថយន្តឡង់គ្រីស័រមួយគ្រឿង ពណ៌ខ្មៅ ពាក់ស្លាកលេខ ភ្នំពេញ 2E-7585 ធ្វើចរាចរណ៍ពីជើងទៅត្បូង លុះមកដល់ចំណុចកើតហេតុ មិនដឹងយ៉ាងម៉េចស្រាប់តែត្រូវភ្លើងឆាបឆេះបង្កឲ្យមានការភ្ញាក់ផ្អើលដល់អ្នកដំណើរទាំងព្រឹកតែម្តង។ ក្រោយកើតហេតុសមត្ថកិច្ចមូលដ្ឋានបានចុះពិនិត្យដល់កន្លែងកើតហេតុ បន្ទាប់ពីពលរដ្ឋដែលនៅជិតកន្លែងកើតហេតុនាំគ្នាយកបំពង់ពន្លត់អគ្គិភ័យបាញ់ពន្លត់ភ្លើង និងជួយអន្តរាគមន៍ទាន់ពេលវេលា រួចផុតពីគ្រោះថ្នាក់ដល់អាយុជីវិត និងខូចខាតទ្រង់ទ្រាយធំ។ ករណីនេះសមត្ថកិច្ចសន្និដ្ឋានបណ្តាលមកពីឆេះក្បាលអាគុយ ៕ ខន សុខា
