សេតវិមានបានបដិសេធចំពោះការអំពាវរបស់អគ្គនាយកអង្គការសុខភាពពិភពលោកដែលឲ្យផ្អាកការចាក់វ៉ាក់សាំងដូសទីបីសិន ដោយសារតែប្រទេសផ្សេងៗជាច្រើនទៀតមិនទាន់មានវ៉ាក់សាំងចាក់ជូនពលរដ្ឋនៅដូសទីមួយនៅឡើយទេ។ សេតវិមានអាមេរិកបានបដិសេធដោយចាត់ទុកថានោះជាជម្រើសក្លែងក្លាយ ។ សារព័ត៌មាន Times of Israel បានដកស្រង់សម្តីលេខាព័ត៌មានសេតវិមាន លោកស្រី Jen Psaki ដែលបានលើកឡើងថា «យើងមើលឃើញថា ទាំងនោះគឺជាជម្រើសក្លែងក្លាយ ហើយយើងអាចធ្វើវាទាំងពីរព្រមគ្នា»។ លោកស្រី Jen Psakiបានបញ្ជាក់ថា អាមេរិកបានផ្តល់វ៉ាក់សាំង ច្រើនជាងគេបំផុតនៅលើពិភពលោក ហើយកំពុងតែស្នើដល់ប្រទេសផ្សេងទៀតជួយចែករំលែកវ៉ាក់សាំងបន្ថែមទៀត។ នៅពេលនេះដែរ ប្រទេសជាច្រើនជុំវិញពិភពលោក ពិសេសគឺប្រទេសអភីវឌ្ឍន៍បានចាប់ផ្តើមចាក់វ៉ាក់សាំងបំពេញបន្ថែមដូសទីបី។ ប្រទេសបារាំងក៏បានឡើងគម្រោងចាក់វ៉ាក់សាំងដូសទីបីផងដែរចាប់ពីខែកញ្ញាខាងមុខនេះទៅ។ នៅលើបណ្តាញសង្គម Instagram ប្រធានាធិបតីបារាំង លោកម៉ាក្រុង បានប្រកាសពីគម្រោងចាក់វ់ាក់សាំងប្រឆាំងកូវីដ -១៩ បំពេញបន្ថែម(ដូសទីបី) ។ នៅថ្ងៃទី៥ខែសីហាប្រធានាធិបតីបារាំង លោក Emmanuel Macron បានបញ្ជាក់ថា មនុស្សមានវ័យចំណាស់ និងមន្ត្រីជួរមុខ អ្នកប្រឈមហានិភ័យឆ្លងខ្ពស់ នឹងទទួលបានការចាក់វ៉ាក់សាំងដូសទីបី។ ការប្រកាសរបស់ប្រធានាធិបតីបារាំង កើតឡើងក្រោយពេលអគ្គនាយកអង្គការសុខភាពពិភពលោក WHO លោក Tedros Adhanom Ghebreyesus បានអំពាវនាវដល់ប្រទេសអ្នកមានផ្អាកចាក់វ៉ាក់សាំងដូសទីបីដល់អ្នកដែលបានចាក់ដូសទីពីររួចរាល់ ដើម្បីទុកវ៉ាក់សាំងនោះចែកជូនប្រទេសដែលកំពុងខ្វះខាត។ បច្ចុប្បន្ន នៅមានពលរដ្ឋជុំវិញពិភពលោកជាង ៣,៥ពាន់លាននាក់មិនទាន់ទទួលបានការចាក់វ៉ាក់សាំងដូសទីមួយនៅឡើយទេ ៕ដោយ៖ធីរីណា
រូបថត៖New York Time.
រូបថត៖AFP/TTXVN
