ភ្នំពេញ ៖ យុវជនម្នាក់ទំនងជាស្រវឹងស្រាបានបើករថយន្តហាយប្រ៊ីដមួយគ្រឿងក៏រេចង្កូតជ្រុលទៅបុកជញ្ជាំងការដ្ឋានសំណង់មួយកន្លែង និងបង្គោលស្លាកសញ្ញាចរាចរណ៍បណ្តាលឱ្យរងការខូចខាត ហើយអ្នកបើកបរ រថយន្តបង្ករត់គេចខ្លួនបាត់បន្សល់ទុកតែរថយន្តនៅនឹងកន្លែងកើតហេតុ ។
ករណីខាងលើនេះ បានកើតឡើងកាលពីវេលាម៉ោង១នឹង៤០នាទី រំលងអាធ្រាតឈានចូលថ្ងៃទី១៩ ខែកក្កដា ឆ្នាំ២០១៥ តាមបណ្តោយផ្លូវលេខ២៤០ កែងនឹងផ្លូវលេខ ១៩ សង្កាត់ជ័យជំនះ ខណ្ឌដូនពេញ ។
តាមប្រភពពត៌មានពីកន្លែងកើតហេតុបានប្រាប់ឱ្យដឹងថា នៅមុនពេលកើតហេតុ គេបានឃើញរថយន្តកាមរីហាយប្រ៊ីដ ពណ៍ទឹកប្រាក់ ពាក់ស្លាកលេខភ្នំពេញ 2Q-2203 បើកបរដោយយុវជនម្នាក់ទំនងជាស្រវឹងស្រា បានបើកតាមបណ្តោយផ្លូវលេខ២៤០ ទិសដៅពីកើតទៅលិច លុះមកដល់ចំណុចកើតហេតុបានរេចង្កូតជ្រុលទៅបុកជញ្ជាំងការដ្ឋានសំណង់ និងបង្គោលស្លាកសញ្ញាចរាចរណ៍រងការខូចខាតតែម្តង ។
ក្រោយកើតហេតុអ្នកបើកបរ រថយន្តបង្ករបានរត់គេចខ្លួនបាត់ដោយបន្សល់ទុកតែរថយន្តនៅនឹងកន្លែងកើតហេតុ ហើយមួយសន្ទុះក្រោយមកក៏មានមិត្តភក្រ្ត បងប្អូនបានមកដោះស្រាយជាមួយនឹងសមត្ថកិច្ចផងដែរ ហើយខាងរថយន្តបង្ករបានទំនាក់ទំនងសុំការអន្តរាគមន៍ ដើម្បីយករថយន្តនេះចេញពីកន្លែងកើតហេតុ ដោយសារតែអះអាងថាជារឿងបន្តិចបន្ទួច ហើយមួយសន្ទុះក្រោយមកសមត្ថកិច្ចមូលដ្ឋានហាក់ដូចជាត្រូវរ៉ូវគ្នាក៏បានឱ្យរថយន្តបង្កនោះចេញទៅបាត់តែម្តង ខណៈដែលសមត្ថកិច្ចជំនាញមិនទាន់នឹងទៅដល់កន្លែងកើតហេតុផងដែរនោះ ៕ស ដារ៉ា
