ភ្នំពេញ៖ សមត្ថភាពនិយាយភាសាអង់គ្លេស រូបសម្រស់ របស់កញ្ញា Magaretបេក្ខភាពកញ្ញាឯកចក្រវាឡ២០២១ បានធ្វើឲ្យគេចាប់អារម្មណ៍មិនតិចនោះទេ។ នាងនឹងបង្ហាញមុខក្នុងកម្មវិធីនាពេលដ៏ខ្លីខាងមុខប៉ុន្តែ អ្វីដែលជាការចាប់អារម្មណ៍នោះ នាងគឺជាកូនស្រីបង្កើតរបស់តារាសម្តែងជើងចាស់លោកស្រី ណិប កេសី។
គេចាំបានថាណិប កេសី ត្រូវបានគេស្គាល់ថាជាអតីតារាសម្តែងស្រីល្បីឈ្មោះ និងជាកញ្ញាឯកស្រស់ស្អាតប្រចាំទស្សនាវដ្តីមួយក្នុងទសវត្សរ៍ទី៩០ ។ នាងបានប្រឡូកក្នុងអាជីពសិល្បៈក្នុងអំឡុងឆ្នាំ១៩៩៥ គ្រាដែលលោកស្រីទទួលបានចំណាត់ថ្នាក់លេខ៣ក្នុងកម្មវិធីប្រកួតសម្រស់របស់ទស្សនាវដ្តីជីវិតកម្សាន្ត ដែលរៀបចំគ្រង់គ្រងដោយលោក ជំទាវ សាន់ណារ៉ា ឡងឌី។ បន្តមកនៅឆ្នាំ ១៩៩៥ អ្នកនាងបានចូលក្នុងការងារសម្ដែង ដោយបានសម្ដែងភាពយន្ត ខារ៉ាអូខេ រួមទាំងដើរម៉ូដទៀត។ អ្នកនាងធ្លាប់សម្ដែងក្នុងរឿងជាច្រើនដូចជា “រំដួលទងមាស” និង”បិសាចចម្លែក” សុទ្ធជារឿងដែលអ្នកនាងទទួលបានការគាំទ្រច្រើន។ លោកស្រី អាណិកជនខ្មែរ-អាមេរិកនៅឆ្នាំ១៩៩៩និងបានបញ្ចប់ការងារសិល្បៈទាំងស្រុងនិងឆ្នាំ ២០០០ដោយ បានចាកចេញទៅរស់នៅសហរដ្ឋអាមេរិក ក្នុងរដ្ឋ ម៉ារីលែនសហរដ្ឋអាមេរិកនោះ ហើយក្នុងអំឡុងឆ្នាំ២០២០ គេឃើញវត្តមានលោកស្រីវិលមកកម្ពុជាជាមួយកូនស្រីបណ្តូលចិត្តខាងលើដោយលោកស្រីធ្លាប់លើកឡើងថា មករស់នៅកម្ពុជា ជាមួយកូនស្រីដែលចង់ប្រឡូកក្នុងអាជីពសិល្បៈ ហើយពេលនេះនាងបានឈោងចាប់ក្តីស្រមៃតាមរយៈការប្រកួតក្នុងកម្មវិធីសម្រស់ធំ និងមានប្រជាប្រិយភាពមួយនៅកម្ពុជានោះ។
ឆ្នាំមុននេះ នេះ យុវតី ម៉ាការ៉ាត់ មានឈ្មោះពេញថា ម៉ាករ៉ាត់ពេជ្រចរណៃ នាងក៏ធ្លាប់បានបង្ហាងមុខក្នុងនាមជាបេក្ខភាពម្នាក់ផងដែរ ប៉ុន្តែនាងមិនបានទៅដល់វគ្គចុងក្រោយឡើយព្រោះតែគ្រានោះនាងនៅពត់ធ្មេញនៅឡើយ។ ម៉ាការ៉ាត់ មានវ័យ២០ឆ្នាំ កម្ពស់១,៦៥ ម៉ែត្រ មានរាងស្រឡូន និងបានឆ្លងកាត់ការហ្វឹកហាត់ដើរបង្ហាញម៉ូតកាលពីឆ្នាំមុននេះគ្រានដែលនាងនិងម្តាយបានវិលត្រឡប់ពីការរស់នៅលើទឹកដីនៃសហរដ្ឋអាមេរិក។នាងក៏មានឪពុកជាអាណិកជនខ្មែររស់នៅសហរដ្ឋអាមេរិក និងបម្រើការងារក្នុងអង្គការ ណាសា។ នាងគឺជាកូនស្រីច្បង និងមានប្អូនប្រុសពៅ អាយុ ១៦ឆ្នាំម្នាក់មានរូបរាងស្រស់សង្ហាផងដែរ។ ក្រោយពីការបង្ហាញវត្តមានជាបេក្ខភាព នាងទទួលបានការលើកទឹកចិត្តជាច្រើនពីទស្សនិកជន ពិសេសក្រុមអ្នកគាំទ្រវិស័យកញ្ញាឯក ខណៈដែលគេដឹងថា កន្លងទៅនាងធ្លាប់បានបង្ហាញមុខក្នុងកម្មវិធីប្រគំតន្ត្រីចុងសប្តាហ៍របស់ស្ថានីយទូរទស្សន៍មួយផងដែរ ព្រោះតែនាងក៏អាចច្រៀងបានផងដែរ ហើយគេរំពឹងថាការប្រើប្រាស់ភាសាអង់គ្លេសរបស់នាងបានល្អព្រោះតែនាងធំធាត់នៅលើទឹកដីនៃសហរដ្ឋអាមេរិកស្រាប់នោះ៕

ដោយ ៖ វឌ្ឍនា