ភ្នំពេញ ៖ ជនសង្ស័យចំនួន៣នាក់ដែលធ្វើសកម្មភាពចូលផ្ទះប្រជាពលរដ្ឋដើម្បីលួចសម្ភារមានតម្លៃនោះ ត្រូវបានកម្លាំងសមត្ថកិច្ចខណ្ឌបឹងកងកេងនៃស្នងការដ្ឋាននគរបាលរាជធានីភ្នំពេញបញ្ជូនខ្លួនទៅកាន់សាលាដំបូងរាជធានីភ្នំពេញ នាព្រឹកថ្ងៃទី១៧ ខែសីហា ឆ្នាំ២០២១ ដើម្បីប្រគល់ជូនតំណាងអយ្យការ អមសាលាដំបូងរាជធានីភ្នំពេញ ធ្វើការសាកសួរបន្ត។
ជនសង្ស័យទាំង៣នាក់នោះមានឈ្មោះ
១- ឈ្មោះ គាត ពិសិដ្ឋ ហៅសិដ្ឋតូច ភេទប្រុស អាយុ៣១ឆ្នាំ ជនជាតិខ្មែរ មានទីលំនៅមិនពិតប្រាកដ មុខរបរ: គ្មាន (ប្រើប្រាស់ថ្នាំញៀន)។
២-ឈ្មោះ គឹម វណ្ឌី ហៅវណ្ឌី ភេទប្រុស អាយុ៦៤ឆ្នាំ ជនជាតិខ្មែរ មានទីលំនៅផ្ទះគ្មានលេខ ផ្លូវលេខ២០៩ ក្រុមទី២៧ ភូមិ៤ សង្កាត់ទំនប់ទឹក ខណ្ឌបឹងកេងកង មុខរបរ: ប្រជាការពារ (ប្រើប្រាស់ថ្នាំញៀន)។
៣-ឈ្មោះ ទួន ផាន់រ៉ា ភេទប្រុស អាយុ២៩ឆ្នាំ ជនជាតិខ្មែរ ស្នាក់នៅផ្ទះជួលគ្មានលេខ ផ្លូវបេតុង សង្កាត់ស្ទឹងមានជ័យខណ្ឌមានជ័យ មុខរបរ: កម្មករផ្សារដើមគ។
គួររំលឹកផងដែរថា កាលពីវេលាម៉ោង៣និង១០នាទីទៀបភ្លឺថ្ងៃទី៥ ខែសីហា ឆ្នាំ២០២១ ជនសង្ស័យមានគ្នា៣នាក់បានធ្វើសកម្មភាពលួចចូលផ្ទះប្រជាពលរដ្ឋ ដើម្បីលួចយកសម្ភារមានតម្លៃបានសម្រេច ហើយម្ចាស់ផ្ទះបានប្តឹងទៅកម្លាំងសមត្ថកិច្ចមូលដ្ឋានឱ្យជួយស៊ើបដើម្បីបង្រ្គាបជនសង្ស័យទាំងនោះ។ លុះមកដល់វេលាម៉ោង២និង៣០នាទីរសៀល ថ្ងៃទី១៤ ខែសីហា ឆ្នាំ២០២១ កម្លាំងជំនាញព្រហ្មទណ្ឌ និងកម្លាំងប៉ុស្ដិ៍នគរបាលរដ្ឋបាលទំនប់ទឹកបានធ្វើការឃាត់ខ្លួនជនសង្ស័យចំនួន៣នាក់ពីបទ៖ សមគំនិតក្នុងអំពើលួច (សម្ភារ) នៅចំណុចមុខផ្ទះលេខ១៤z ផ្លូវលេខ២០៧ ក្រុមទី២៦ ភូមិ៤ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ ។
ក្នុងនោះមានវត្ថុតាងដូចជា ៖ តុឈើចំនួន១, គ្រែឈើចំនួន១, ហ្គីតាក្នុងស្រោមចំនួន១, ក្បាលកុំព្យូទ័រចំនួន១គ្រឿងម៉ាកឌែល(ក្នុងបន្ទប់ដេករបស់ឈ្មោះគឹម វណ្ឌដា) ធុងសាំងចំនួន១ពណ៌ក្រហម និងកាងរថយន្ដចំនួន២ពណ៌សនិងពណ៌ខ្មៅ (នៅមុខផ្ទះ) រនូតគ្រែចំនួន២៣ដើម,ទ្វារដែកចំនួន១,ទ្វារឈើចំនួន១និងកញ្ចក់ពណ៌ខ្មៅមួយផ្ទាំង(នៅមុខឃ្លាំងក្បែរផ្ទះជនសង្ស័យ) ជារបស់ជនរងគ្រោះ។វត្ថុតាងដែលសមត្ថកិច្ចរឹបអូសបាននេះត្រូវបានប្រគល់ឲ្យជនរងគ្រោះវិញតាមពាក្យស្នើសុំ ដោយមានការឯកភាពពីលោក វង្ស សាវ៉ាត ព្រះរាជអាជ្ញារងអមសាលាដំបូងរាជធានីភ្នំពេញ។
នាពេលបច្ចប្បន្ននេះ ជនសង្ស័យទាំង៣នាក់កំពុងស្ថិតក្នុងដំណាក់កាលតំណាងអយ្យការ លោកព្រះរាជអាជ្ញារង អមសាលាដំបូងរាជធានីភ្នំពេញកំពុងធ្វើការសាកសួរ៕
ដោយ ៖ រ៉ារ៉ា
