ភ្នំពេញ៖ នៅព្រឹកថ្ងៃទី ២៦ ខែ មីនា ឆ្នាំ ២០១៦នេះ ក្រុមការងារអនុសាខាកាកបាទក្រហមកម្ពុជា ខណ្ឌពោធិ៍សែនជ័យ ដឹកនាំដោយ លោក ហែម ដារិទ្ធ ប្រធានកិត្តិយសអនុសាខា បានចុះសាកសួរសុខទុក្ខ និងនាំយកអំណោយមនុស្សធម៌របស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ទៅចែកជូនដល់ចាស់ជរា ទុរគតជន រស់នៅភូមិប៉ប្រកខាងត្បូងចំនួន១៣នាក់ ក្នុងនោះប្រមូលផ្តុំចែកនៅទីស្នាក់ការភូមិ១១នាក់ និងនាំយកទៅចែកជូនដល់ផ្ទះ២នាក់ ដែលជាចាស់ជរាគ្មានទីពឹងមានជំងឺដើរមិនរួច។

ទន្ទឹមនឹងការពាំនាំនូវសេចក្តីផ្តាំផ្ញើសាកសួរសុខទុក្ខពីសំណាក់ សម្ដេចកិត្តិព្រឹទ្ធបណ្ឌិតប្រធាន ជូនដល់លោកតាលោកយាយទាំងអស់ លោកប្រធានកិត្តិយសអនុសាខា បានលើកទឹកចិត្តដល់លោកតាលោកយាយកុំមានការអស់សង្ឃឹម ប្រការសំខាន់ សូមយកចិត្តទុកដាក់ពីសុខភាព រក្សាឲ្យបាននូវអនាម័យទាំងការរស់នៅ និងការហូបចុក ដើម្បីចៀសវាងពីជំងឺដង្កាត់ផ្សេងៗមកបៀតបៀន។