ខ្សែប្រយុទ្ធ Tammy Abraham បានបញ្ចប់ការផ្ទេរ៤០លានអឺរ៉ូ (៣៤លានផោន) ពីក្រុមតោខៀវ Chelsea ពីទៅក្លិបអុីតាលី Roma។ នេះបើយោងតាមការចេញផ្សាយរបស់ BBC Sport កាលពីថ្ងៃទី១៨ សីហា ២០២១។

Abraham ដែលជាអ្នករកគ្រាប់បាល់បញ្ចូលទីច្រើនជាងគេរបស់ក្រុមតោខៀវ Chelsea កាលពីរដូវកាលមុនបានចូលរួមជាមួយក្លិបនៅក្របខ័ណ្ឌ Serie A ដែលគ្រប់គ្រងដោយអតីតគ្រូបង្វឹកក្រុមតោខៀវ Chelsea លោក Jose Mourinho ក្នុងកិច្ចព្រមព្រៀងរយៈពេល៥ឆ្នាំ។ កិច្ចព្រមព្រៀងសម្រាប់កីឡាករអង់គ្លេសវ័យ២៣ឆ្នាំរូបនេះរួមបញ្ចូលទាំងលក្ខខណ្ឌទិញត្រឡប់មកវិញក្នុងតម្លៃ៦៨លានផោន។

កីឡាករ Abraham បាននិយាយថា “អ្នកអាចដឹងនៅពេលក្លិបមួយចង់បានអ្នក ហើយ Rom បានបង្ហាញចំណាប់អារម្មណ៍របស់ពួកគេភ្លាមៗ។ Roma គឺជាក្លិបមួយដែលសមនឹងទទួលបានការប្រយុទ្ធដើម្បីពានរង្វាន់។ ខ្ញុំមានបទពិសោធន៍ក្នុងការឈ្នះពានរង្វាន់ធំៗ ហើយខ្ញុំចង់នៅក្នុងការប្រកួតទាំងនោះម្តងទៀត ដូច្នេះខ្ញុំចង់ជួយក្រុមនេះឱ្យសម្រេចបាន និងឈានដល់កម្រិតកន្លែងដែលក្លិបគួរតែមាន។ វាជាកិត្តិយសដ៏ធំធេងដែលខ្ញុំបានលេខ៩នៅក្លិបនេះ ហើយខ្ញុំមិនអាចរង់ចាំដើម្បីចាប់ផ្តើមនិងជួយក្រុមបានទេ” ។

ក្លិបនៅក្របខ័ណ្ឌ Premier League បានចុះហត្ថលេខាឡើងវិញជាមួយអតីតខ្សែប្រយុទ្ធ Romelu Lukaku ពីក្លិប Inter Milan ក្នុងតម្លៃ៩៧.៥លានផោនកាលពីថ្ងៃព្រហស្បតិ៍សប្តាហ៍មុន។ ក្លិប Inter Milan បានជំនួស Lukaku ដោយចុះហត្ថលេខាជាមួយ Edin Dzeko អតីតខ្សែប្រយុទ្ធរបស់ក្រុម Roma វិញ។

សូមបញ្ជាក់ថា Abraham ដែលធ្លាប់ខ្ចីជើងនៅក្លិប Bristol City, Swansea City និង Aston Villa បានធ្វើដំណើរទៅប្រទេសអ៊ីតាលីកាលពីថ្ងៃអាទិត្យដើម្បីពិនិត្យសុខភាពបន្ទាប់ពីក្រុម Roma បានចុះកិច្ចព្រមព្រៀងជាមួយក្រុមជើងឯកអឺរ៉ុប Chelsea កាលពីចុងសប្តាហ៍មុន។ កីឡាកររូបនេះបានជួយក្លិបឈ្នះពានរង្វាន់នៅអង់គ្លេស៦លើករកបាន៣០គ្រាប់ក្នុងការបង្ហាញខ្លួន៨២លើកសម្រាប់ក្រុមតោខៀវ Chelsea ៕ (រូបភាព ៖ BBC Sport)