អន្តរជាតិ៖ បើតាមទីភ្នាក់ងារសារព័ត៍មានថៃ Bangkok Post បានដកស្រង់ចេញផ្សាយពីក្រសួងសុខាភិបាលថៃ នៅថ្ងៃព្រហស្បតិ៍ ទី១៩ ខែសីហា ឆ្នាំ២០២១នេះថា ត្រឹមរយៈពេលតែ ២៤ម៉ោងប៉ុណ្ណោះ អ្នកជំងឺកូវីដ-១៩ ចំនួន ៣០១នាក់បានស្លាប់ប្រចាំថ្ងៃ ខ្ពស់បំផុតថ្មីមួយទៀត,ខណៈអជ្ញាធរមូលដ្ឋាន បន្តរកឃើញករណីឆ្លងជំងឺ COVID-19 ថ្មីៗ មានចំនួនរហូតដល់ ២០,៩០២ករណីបន្ថែមទៀត ក្នុងរយៈពេល ២៤ម៉ោងដូចគ្នា។
ជាក់ស្ដែងក្រសួងសុខាភិបាលថៃ បានគូសបញ្ជាក់ថា ក្នុងចំណោមករណីឆ្លងថ្មីៗខាងលើនេះមាន ២០,៧៥៤ករណី ត្រូវបានរកឃើញនៅលើប្រជាជនថៃទូទៅ និង១៤៨ករណីទៀត ត្រូវបានរកឃើញនៅលើអ្នកទោសតាមពន្ធនាគារ។ ក្រៅពីការរកឃើញករណីឆ្លងថ្មីៗ និងអ្នកជំងឺស្លាប់នោះ ក៏មានអ្នកជំងឺចំនួន ២២,២០៨នាក់ផ្សេងទៀត ទើបតែត្រូវបានអនុញ្ញាតឱ្យចាកចេញពីមន្ទីរពេទ្យ ក្រោយជាសះស្បើយ។
គួរបញ្ជាក់ថា បច្ចុប្បន្នប្រទេសថៃ រហូតមកទល់ពេលនេះ បានកត់ត្រានូវករណីឆ្លងសរុប នៅទូទាំងប្រទេសចំនួន ៩៨៩,៨៥៩ករណី ក្នុងនោះមានអ្នកស្លាប់ ៨,៥៨៦នាក់ និងអ្នកជាសះស្បើយឡើងវិញ ៧៧៥,៣២៧នាក់៕ដោយ៖ស តារា
