ខេត្តពោធិ៍សាត់៖ ក្មេងជំទង់ម្នាក់បានធ្វើដំណើរដោយម៉ូតូ១គ្រឿងត្រូវបាន​ស​ត្វ​ឆ្កែដេញខាំបានបើកម៉ូតូចូលរថយន្តបណ្ដាលឱ្យរបួសធ្ងន់បាក់ជើងស្ដាំ ។

ហេតុការណ៍នេះបានកើតឡើងកាលពីវេលាម៉ោង៧ និង៣០នាទីព្រឹក ថ្ងៃទី២៦ ខែមីនា ឆ្នាំ២០១៦ ស្ថិតក្នុងភូមិចំការចេកខាងជើង សង្កាត់ផ្ទះព្រៃ ក្រុង-ខេត្តពោធិ៍សាត់ ។

ប្រភពពីនគរបាលក្រុងពោធិ៍សាត់ បានឱ្យដឹងថា ជនរងរបួសត្រូវបានគេស្គាល់ឈ្មោះ ស៊ុន រ៉ា ភេទប្រុស អាយុ១៥ឆ្នាំ រស់នៅភូមិដង្គារ សង្កាត់ផ្ទះព្រៃ ក្រុង-ខេត្តពោធិ៍សាត់ ធ្វើដំណើរដោយម៉ូតូ ១គ្រឿងម៉ាក វីវ៉ា ពណ៌ខ្មៅ ពាក់ស្លាកលេខ ភ្នំពេញ 1AB-7200 ធ្វើដំណើរក្នុងទិសដៅពីជើងទៅត្បូង លុះមកដល់ចំណុចកើតហេតុគេឃើញមានសត្វឆ្កែ១ក្បាលបានដេញ ធ្វើឱ្យជនរងគ្រោះភ័យ ក៏បានបើកម៉ូតូទៅចូលរថយន្តដឹកទឹកសុទ្ធ បណ្ដាលឱ្យរបួសបាក់ជើងស្ដាំតែម្ដង ។

ប្រភពបន្តថា រថយន្តដឹកទឹកសុទ្ធម៉ាកហ៊ីយ៉ាន់​ដាយ ពណ៌ខៀវ ពាក់ស្លាកលេខ ភ្នំពេញ 2D-6270 បើកបរដោយឈ្មោះ យន់ សារី ភេទប្រុស អាយុ ២២ឆ្នាំ រស់នៅភូមិ-សង្កាត់បន្ទាយដី ក្រុង-ខេត្តពោធិ៍សាត់ ធ្វើដំណើរ​បញ្ច្រាស់ទិសគ្នា (ពីត្បូងទៅជើង) ។

ប្រភពបន្តទៀតថា វត្ថុតាងម៉ូតូ និងរថយន្តត្រូវបាន​សមត្ថកិច្ចយកទៅរក្សាទុកនៅអធិការដ្ឋាននគរបាលក្រុងពោធិ៍សាត់ ដើម្បីរង់ចាំធ្វើការដោះស្រាយគ្នាតាមនីតិវិធី ចំណែកជនរងរបួសត្រូវបាន​គេបញ្ជូនទៅ​មន្ទីរពេទ្យ។

ដោយ៖ ប៉ឹម ពិន