ខេត្តសៀមរាប៖ មន្ត្រីជំនាញសាខា ក.ប.ប. ខេត្តសៀមរាប សហការជាមួយមន្រ្តីមន្ទីរពាណិជ្ជកម្មខេត្ត នៅថ្ងៃអង្គារ ១រោច ខែស្រាពណ៍ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី២៤ ខែសីហា ឆ្នាំ២០២១នេះ បានធ្វើការត្រួតពិនិត្យទំនិញ និងអាល់កុល នៅតាមបណ្តាដេប៉ូចែកចាយ ក្នុងសង្កាត់ស្វាយធំ និងតាមបណ្តោយផ្លូវក្រវ៉ាត់ក្រុងទី២ ជាលទ្ធផលមន្ត្រីជំនាញពុំបានរកឃើញអាល់កុលក្លែងក្លាយ (មានសារធាតុមេតាណុល) នោះទេ។
ដោយឡែកក្នុងប្រតិបត្តិការនេះដែរ មន្រ្តីជំនាញ បានដកហូតទំនិញដែលមិនមានភាពអនុលោមមួយចំនួនដូចជា៖ ១. ទឹកដោះគោ Dutch Milk ចំនួន ២០ កំប៉ុង
២. ទឹកដោះគោ AD ចំនួន ២៦ ដប
៣. ទឹកក្រូច កូកាកូឡា ចំនួន ០៥ ដប
៤. ទឹកដោះគោខាប់ ចំនួន ០២ កំប៉ុង
ទំនិញដែលបានដកហូតនឹងត្រូវកម្ទេចចោលតាមនីតិវិធីនាពេលក្រោយ។
សូមជម្រាបថា មន្ត្រី ក.ប.ប. ប្រចាំខេត្តសៀមរាបបានរកឃើញទំនិញចំនួន ២៥១.៧៩គីឡូក្រាម ដែលខូចគុណភាព និងហួសកាលបរិច្ឆេទប្រើប្រាស់ កាលពីថ្ងៃទី២៣ ខែសីហាម្សិលមិញនេះ ខណៈពេលកំពុងចុះត្រួតពិនិត្យបណ្តាផ្ទះលក់ទំនិញនិងឃ្លាំងស្តុកនានាក្នុងក្រុងសៀមរាប ខេត្តសៀមរាប។
ក្រោយពីបានរកឃើញទំនិញដូចជាទឹកដោះគោ ស្រាបៀរ មីកំប៉ុង ស្ករអំពៅ ដុំស៊ុប និងភេសជ្ជៈមួយចំនួនខាងលើ មន្ត្រី ក.ប.ប. បានធ្វើការពិន័យអន្តរការណ៍លើម្ចាស់ទំនិញទៅតាមនីតិវីធីដែលមានចែងក្នុងច្បាប់ និងដកហូតទំនិញទាំងនោះមករក្សាទុកដើម្បីកម្ទេចចោលនៅពេលក្រោយ៕ដោយ អរុណរះ
