ខេត្តសៀមរាប៖ ជនជាតិកូរ៉េ ចំនួន៣នាក់ ដែលបាននាំចូលទូរស័ព្ទដៃទំនើបៗ គេចពន្ធតាមជើងយន្តហោះហើ BX៧២១ និង OZ៩៧៥៥ មកពីប្រទេសកូរ៉េ ចូលមកព្រលានយន្តហោះអន្តរជាតិសៀមរាប ត្រូវបានសមត្ថកិច្ចចម្រុះ សហការណ៍ ជាមួយមន្ត្រីគយ ប្រចាំច្រកព្រលានយន្តហោះអន្តរជាតិសៀមរាប ឃាត់ខ្លួនបានភ្លាមៗ និងដកហូតបានវត្ថុតាង ទូរស័ព្ទដៃ ស្មាតហ្វូន ចម្រុះចំនួន៤៧១គ្រឿង ដែលបាននាំយកមកពីប្រទេសកូរ៉េផ្ទាល់។
ហេតុការណ៍ឃាត់ខ្លួនជនជាតិកូរ៉េ៣នាក់និងវត្ថុតាងនោះធ្វើឡើង នៅម៉ោង២៤និង០០នាទី យប់ថ្ងៃទី២៦ ខែមីនា ឆ្នាំ២០១៦ ស្ថិតនៅចំណុចក្នុងព្រលានយន្តហោះអន្តរជាតិសៀមរាប។
តាមប្រភពពីមន្ត្រីគយបានប្រាប់រសៀលថ្ងៃទី២៧ខែមីនានេះថា ក្រោយពីធ្វើការឃាត់ខ្លួនជនជាតិ កូរ៉េទាំង៣នាក់ និងវត្ថុតាងខាងលើនេះ ដោយមានការសហការល្អពីកម្លាំងសមត្ថកិច្ចចម្រុះរួមមាន៖ អាវុធហត្ថប្រចាំការក្នុងព្រលាន និងនគរបាលដែល ឈរជើងនៅក្នុងព្រលានយន្តហោះនោះ ទើបកម្លាំងមន្ត្រីគយរបស់យើង ចុះធ្វើការត្រួតពិនិត្យនិងឆែកឆេររកឃើញវត្ថុតាងអត់មានបិតតែមពន្ធ ទូរស័ព្ទដៃ ម៉ាកស្មាតហ្វូន ចំរុះចំនួន៤៧១គ្រឿង ដែលបាននាំចូលយកមកពីប្រទេសកូរ៉េផ្ទាល់។ ដែលជើងយន្តហោះហើម៉ាក BX៧២១ និង OZ៩៧៥៥ មកពីប្រទេសកូរ៉េ ចូលមកព្រលានយន្តហោះអន្តរជាតិសៀមរាប។
ប្រភពបានបន្តថា ក្រោយពីធ្វើការឆែកឆេរនិងដកហូតបានវត្ថុតាងរួចមក កម្លាំងមន្ត្រីជំនាញបានយកមកធ្វើការសួរនាំនៅកន្លែងគយប្រចាំការនៅក្នុងព្រលានយន្តហោះអន្តរជាតិសៀមរាបតែម្តង។ ប្រភពបានបញ្ជាក់ទៀតថា ជនជាតិកូរ៉េ ទាំង៣នាក់ ដែលសមត្ថកិច្ចឃាត់ខ្លួនបាននិងវត្ថុតាង ទូរស័ព្ទដៃ នោះពួកគេបានធ្វើដំណើរតាមជើងហោះហើរ BX៧២១និង OZ៩៧៥៥ មកពីប្រទេសកូរ៉េ។
តាមប្រភពបានបញ្ជាក់បន្ថែមទៀតថា ជនសង្ស័យជាជនជាតិកូរ៉េទាំង៣នាក់ ដែលសមត្ថកិច្ចឃាត់ខ្លួនបាននោះមាន ទី១/ឈ្មោះ Kim Namgyu ភេទប្រុស អាយុ៤៦ឆ្នាំ ទី២/ឈ្មោះ Kang Donghwo ភេទប្រុស អាយុ៣៤ឆ្នាំ ទី៣/ឈ្មោះKong Sangmooon ភេទប្រុសអាយុ៥២ឆ្នាំ ។
បច្ចុប្បន្នជនសង្ស័យជាជនជាតិកូរ៉េទាំង៣នាក់ និងវត្ថុតាងត្រូវបានកម្លាំងជំនាញកំពុងរៀបចំកសាងសំណុំរឿងបញ្ជូនទៅខាងអគ្គនាយកគយ និងរដ្ឋាករ រាជធានីភ្នំពេញ ដើម្បីធ្វើការផាក់ពិន័យទៅតាមច្បាប់ស្តីពីពន្ធគយ៕
ដោយ៖ ប៊ុន រិទ្ធី
